Taylor Swift ‘TTPD’ kar 11 a No.1 tling ta

Taylor Swift album ‘The Tortured Poets Department’ (TTPD) chu Billboard 200 (albums) chart-ah a No.1 a, he chart-a kar 11 a No.1-na niin, Swift album-ah he chart-a kar 11 No.1 thei pathumna a ni a, a album dang ‘1989’ leh ‘Fearless’ te chu kar 11 ve ve an lo No.1 tawh bawk a, Swift album zingah he chart-a No.1 ni rei thei ber an ni. Hetihrual hian Megan Thee Stallion album thar pawh top three-ah a debut a, Beyonce ‘Cowboy Carter’ pawh top 10-ah a rawn lang thar ve leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘TTPD’ hi kar khat chhungin 1,14,000 an hralh leh a, chung zinga 78,000 chu streaming atanga album tlukpui (on-demand official stream maktaduai 102.09) niin, album tak tak hralh chu 35,000 a ni a, album-a hla mal hralhna atangin 1,000 a tling thei bawk.
Taylor Swift hian CD chi hnih a tichhuak tar a, Swift webstore atanga hralh chhuah niin, heng CD-ah te hian a standard album-a hla 16 te bakah acoustic bonus track (pakhatah ‘Fortnight’ featuring Post Malone leh, a danga ‘Fresh Out the Slammer’) te awmin, hei hian album hralh a tipung leh deuh a ni.
‘TTPD’ hi chart-a a lan theihna hmasa ber atangin No.1 ni nghalin, an tlangzarh atanga kar 11 chhung a No.1 thei a, hetiang tithei hi hmeichhe zaithiam dang zinga Whitney Houston chiah a la awm a, 1987 khan a album ‘Whitney’ chu chart No.1-ah debut-in, kar 11 chhungin a No.1 a ni. Swift hian chart-a kar 11 chhung No.1 thei album dang pawh a nei nain, mahse, heng album dang te hi chu chart No.1-a a debut atanga a zawna kar 11 chhung No.1 ni zui nghal an ni lo.
Mipa lamah pawh hetianga chart No.1-a debut a, kar 11 emaw a aia rei emaw No.1 zui thei hi album pahnih chiah a la awm a, Morgan Wallen ‘One Thing at a Time’ chu 2023-204 khan No.1-ah debut-in, kar 12 a No.1 zui a, Stevie Wonder album ‘Songs in the Key of Life’ pawh 1976 khan No.1-ah debut-in, kar 13 chhung a No.1 zui ta bawk.
He chart-a kar 11 chin No.1 ni thei album pathum emaw a aia tam emaw nei thei hi an la tam lo hle a, Swift tih lohah chuan Whitney Houston leh The Beatles chiah an la awm. Whitney Houston self-titled album chu 1986 khan kar 14 a No.1 a, 1987-a a album dang ‘Whitney’ chu kar 11 a No.1 leh a, 1992-93-ah ‘The Bodyguard’ chu kar 20 a No.1 bawk. The Beatles album ‘Meet the Beatles!’ chu 1964 khan kar 11 a No.1 a, 1964-ah tho hian ‘A Hard Day’s Night’ chu kar 14 No.1-in, 1967-ah ‘Sgt. Pepper’s Lonely Hearts Club Band’ chu kar 15 a No.1 a, 1969-70-ah ‘Abbey Road’ chu kar 11 a No.1 thei bawk.
Taylor Swift hian he chart-a No.1 kai thei album 14 nei tawhin, chung album hrang hrang te No.1 tawh hun chhung belhkhawm chu kar 80 a tling ta a, soloist zinga he chart-a No.1 ni rei ber a nihna a sawh nghet leh ta sauh a ni.
Chart No.1 hlui Morgan Wallen ‘One Thing at a Time’ chu 74,000 hralh lehin No.3 atangin No.2 a kai thar leh ta bawk.
Megan Thee Stallion album ‘Megan’ chu 64,000 hralhin No.3-ah a debut a, he chart-a a album top 10 kai thei parukna a ni.
Billie Eilish ‘Hit Me Hard and Soft’ chu 63,000 hralh lehin No.4-ah bawk a la awm a, Chappell Roan ‘The Rise and Fall of a Midwest Princess’ chu 60,000 hralh lehin No.6 atangin No.5-ah a insawn ve leh ta bawk.
Chart top 5- Swift, Megan, Eilish leh Roan te hi hmeichhia vek niin, kum khat chuang hnuah he chart top 5-a hmeichhia hlir an awm lehna hmasa ber a ni.
Chart No.1 hlui Morgan Wallen ‘Dangerous: The Double Album’ chu 44,000 hralh lehin No.7 atangin No.6 a kai thar leh a, Peso Pluma ‘Exodo’ chu 40,000 aia tam deuh hralh lehin No.5 atangin No.7-ah a tawlh a, Shaboozey ‘Where I’ve Been, Isn’t Where I’m Going’ chu 40,000 hralh lehin No.10 atangin No.8-a a insawn leh a, Noah Kahan ‘Stick Season’ chu 39,000 hralh lehin No.11 atangin No.9 a kai thar leh a, Beyonce album, chart No.1 pawh lo ni tawh, ‘Cowboy Carter’ chu 39,000 tling lo deuh hralh lehin No.50 atangin No.10-ah a invawrh thar ve leh ta bawk.