Taylor Swift TTPD kar 7 a No.1 ta

Taylor Swift album ‘The Tortured Poets Department’ (TTPD) chu Billboard 200 (albums) chart-ah a No.1 a, he chart-a kar sarih a No.1-na a ni ta. Hetihrual hian ATEEZ leh Saboozey te pawh top five-ah an debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album tlukpui le album-a hla mal hralhna atanga album tlukpui te belhkhawm thin a ni.
Taylor Swift TTPD hi kar khat chhungin 1,48,000 an hralh leh a, chung zinga 1,20,000 chu streaming atanga album hralhna tlukpui (on-demand official stream maktaduai 157.26) niin, album tak tak hralh chu 27,000 a ni a, album-a hla mal hralhna atangin 1,000 a tling thei bawk.
Taylor Swift hian he chart-a No.1 kai thei album 14 a nei tling tawh a, soloist zingah Jay-Z record nihrualin, No.1 album ngah ber a ni a, chung zingah chuan TTPD hi No.1 nih reiah palina niin, Red a nih rualin, a album hmasa ‘1989’ leh ‘Fearless’ te kha kar 11 ve ve an No.1 tei a, Folklore kar riat a No.1 thei bawk.
He chart-a Taylor Swift album hrang hrang No.1 tawhte No.1 hun chhung belhkhawm chu kar 76 a tling ta a, soloist zingah e chart-a No.1 ni rei ber a nihna a sawh nghet lehzual a, amah hnaih bertu chu Elvis Presley niin, kar 67 a No.1 thei.
K-pop group ATEEZ album tar ‘Golden Hour: Part.1’ chu 1,31,000 hralhin No.2-ah a debut a, chung zingah 1,27,000 chu album tak tak hralhna a ni a, streaming atangin 4,000 (on-demand official stream maktaduai 6.15) a tling thei bawk. ATEEZ hian an album panga te chu chart top 10-ah an la debut pui thei vek a ni.
Billie Eilish album ‘Hit Me Hard and Soft’ chu 1,17,000 hralh lehin No.2 atangin No.3-ah a tawlh a, chart No.1 hlui Morgan Wallen ‘One Thing at a Time’ chu 71,000 hralh lehin No.4-ah bawk a la awm.
Shaboozey album thar ‘Where I’ve Been, Isn’t Where I’m Going’ chu 50,000 hralhin No.5-ah a debut a, chung zingah 39,000 chu streaming atanga album tlukpui (on-demand official stream maktaduai 52,66) niin, album tak tak hralh chu 8,000 a ni a, album-a hla mal hralhna atangin 3,000 a tling thei bawk. He album hi a hla hit ‘A Bar Song (Tipsy)’ awmna kha niin, he hla hi Billboard Hot 100 (singles) chart-ah pawh No.3 a kai thei nghe nghe a ni.
Chart No.1 hlui bawk Morgan Wallen ‘Dangerous: The Double Album’ chu 43,000 hralh lehin No.6-ah bawk a la awm a, Noah Kahan ‘Stick Season’ chu 42,000 hralh lehin No.9 atangin No.7 a kai thar leh a, chart No.1 hlui Future leh Metro Boomin ‘We Don’t Trust You’ chu 40,000 hralh lehin No.7 atangin No.8-ah a tawlh a, Gunna ‘One of Wun’ chu 40,000 tling lo deuh hralh lehin No.8 atangin No.9-ah a tawlh a, chart No.1 hlui Zach Bryan self-titles album chu 36,000 hralh lehin No.10-ah bawk a la awm.