Taylor Swift album ‘The Tortured Poets Department’ (TTPD) chu Billboard 200 (albums) chart-ah a No.1 a ni a, he chart-a a zawna kar kua a No.1-na a ni ta. Hetihrual hian Don Toliver, $uicideboy$, Luke Combs leh NAYEON te pawh chart top 10-ah an debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Taylor Swift ‘TTPD’ hi kar khat chhungin 1,26,000 a la hralh thei a, chung zinga 93,000 chu streaming atanga album hralhna tlukpui (on-demand official stream maktaduai 121.32) niin, album tak tak hralh chu 33,000 a ni a, album-a hla mal hralhna atangin 1,000 a tling thei bawk.
‘TTPD’ hi Taylor Swift album zinga he chart-a No.1 nih rei theihah pahnihna niin, kar 11 No.1 thei ‘Fearless’ leh ‘1989’ chiah a pha lo a, tihian he chart-a a album hrang hrang No.1 tawhte No.1 chhung rei zawng belhkhawm chu kar 78 a tling ta a, he chart-a soloist zinga No.1 ni rei ber a nihna a sawhnghet leh ta sauh a ni (soloist zinga Swift hnaih bertu chu Elvis Presley niin, kar 67 a No.1 thei). Swift hi No.1 album pawh 14 nei tawhin, Jay-Z record nih rualin, soloist zinga No.1 album ngah ber a ni bawk.
Billie Eilish album ‘Hit Me Hard and Soft’ chu 84,000 hralh lehin No.2 a la ni.
Don Toliver album tar ‘Hardstone Psycho’ chu 76,500 hralhin No.3-ah a debut a, he chart-a a tlen sân ber tum niin, chart top 10-a lang thei album pali a nei tling ve ta bawk. ‘Hardstone Psycho’ hralhna hi 57,000 chu streaming (on-demand official streaming maktaduai 75.98) niin, album tak tak hralh chu 19,500 a ni a, album-a hla mal hralhna chu chhiar tham a ni lo thung. He album-ah hian Cash Cobain, Future, Kodak Black, Metro Boomin, Travos Scott, Teezo Touchdown leh Charlie Wilson a thawhpuina hlate pawh a tel.
Chart No.1 hlui Morgan Wallen ‘One Thing at a Time’ chu 73,000 hralh lehin No.4 a la ni. He album hi chart top 10-ah kar 53 chhung a lang tawh a, No.6 aia hniamah a la tawlh lo a, 2023-ah khan Billboard Year End Top Album a lo ni tawh bawk.
$uicideboyS ($crim leh Ruby da Cherry) album thar ‘New World Depression’ chu 66,000 hralhin No.5-ah a debut a, he chart-a an thlen sân ber a la ni a, an top 10 album palina a ni bawk. An album hi 46,000 chu streaming atanga album tlukpui (on-demand official stream maktaduai 62.75) niin, album tak tak hralh chu 20,000 a ni a, album-a hla mal hralhna chu chhiar tham a ni lo.
Luke Combs album thar ‘Faters & Sons’ pawh 60,000 hralhin No.6-ah a debut a, he chart top 10-a lang thei album paruk a neihna a ni. He album-a hlate hi fate tana pa nih chungchang vel a phuahna niin, Combs hian fapa pahnih a nei tawh. A album hralh hi 45,000 chu streaming atanga album tlukpui (on-demand official stream maktaduai 58.11) niin, album tak tak hralh chu 14,000 a ni a, album-a hla mal hralhna atangin 1,000 a tling thei bawk.
K-pop group TWICE member NAYEON album thar ‘NA’ chu 47,000 hralhin No.7-ah a debut a, he chart top 10-a lang thei solo album pahnih a neihna a ni a, 43,000 chu album tak tak hralhna niin, 4,000 chu streaming (on-demand official stream maktaduai 5.41) a ni a, hla mal hralhna chu chhiar tham loh a ni.
Chappell Roan ‘The Rise and Fall of a Midwest Princess’ chu 46,000 hralh lehin No.10 atangin No.8-ah a insawn a, Carli XCX ‘Brat’ chu 45,000 hralh lehin No.3 atangin No.9-ah a tawlh a, chart No.1 hlui Morgan Wallen ‘Dangerous: The Double Album’ chu 44,000 hralh lehin No.7 atangin No.10-ah a tawlh ta bawk. ‘Dangerous’ album hi a zawn ni lovin he chart top 10-ah hian kar 138 a lang tling tawh a, he chart-a solo artist album top 10-a lang rei thei ber record a siam chu a la sawhnghet ta zel a ni.
-- Advertisement --
June ni 23 zana Wembley Stadium, London-a Taylor Swift ‘Eras Tour’ show-ah Travis Kelce stage-ah inlanin, fans an barakhaih a, Travis a inlan hian mipui thawm a \ha ham ham hle.
Taylor Swift hian a album thar ‘The Tortured Poets Department’ a hla ‘I Can Do It With a Broken Heart’ tih a sak laiin, Travis Kelce hi tuxedo leh top hat inbel chungin backup dancer zinga a inlan a, Swift chu moneituin a nupui a pawm ang deuha pawm kangin, stadium chhunga mipui 90,000 vel zet thawm pawh a \ha hle a ni.
He show-ah hian ‘So High School’ tih hla a sak laiin Taylor hian a bialpa tan tiin, thal kap lai lem a siam bawk. Travis hian NFL gamea touchdown lawm nan hetiang hian a ti \hin a ni. Swift leh Travis te hi nikum nipui lai a\anga inzui \an kha niin, Travis hian Eras Tour show \um riat a chhim ve tawh a ni.