TBL an chak nghal
March ni 24, zirtawp zan khan Mizoram Super League season 8 final thawhkhatna khelh a ni a, Khatla TBL chuan point 76-73 a champion lai Zarkawt BCA hnehin, champion turin hma lam an pan.
MSL 8 final thawhkhatnaah champion lai Zarkawt BCA leh champion thar nih ngei tuma tan khawh Khatla TBL ten inkhel hmuhnawm an lantir a, an inhnehtawk nghal hle. Inkhel hmuhnawm takah hian Khatla TBL in bul an tan tha a, quarter khatnaah point liin chungnung zawkah an tang nghal. Bul tan fuh lo mah se Zarkawt BCA an insiamtha thuai a, quarter hnihnaah point liin chungnung zawkah an rawng tang ve leh a, point 40 ve ve thawkchhuak a inhnehtawk chungin chawlhlawk an hmang.
Chawlhlawk hnu lamah BCA in bul an tan fuh zawk a, quarter thumnaah point 1 in chungnung zawkah an tang. Quarter hnuhnung berah hnehna chan ngei tumin Khatla TBL in tan an khawh chiam a, point li a chungnungin, an khingpuite hi point thumin an lehthal a, final thawh khatnaah chak zawk an ni a, champion turin dinhmun tha zawkah an ding rih. Final hi game thum khelh tur a ni a, TBL hian champion turin vawi khat chak chiah an mamawh tawh a. An trophy kawl mek humhim turin Zarkawt BCA hi vawihnih an chak zawn a ngai tawh thung. Final thawh hnihna hi March ni 28, Thawhleh zanah khelh a ni ang.
MSL 8 final thawhkhatnaah hian Khatla TBL player pawimawh Vanlalthazuala chu point thawkchhuak hnem ber a ni a, BCA an hneh theih nan point 27 a thawkchhuak. TBL tan hian Joshua Keyes chuan point 24 a thawkchhuak a, BCA tana point thawkchhuak hnem ber Joseph Allen chuan point 26 a thawkchhuak ve bawk.
TBL an chak nghal
Get real time updates directly on you device, subscribe now.
Prev Post
Next Post