Technology zirlai leh H/S zirlai inkawm

Technology zirlai leh H/S zirlai inkawm
Indian Institutes of Technology Madras leh National Institute of Technology Mizoram zirlaite chuan tunlai hian Aizawlah internship an hmang ho mek a. Sawrkar hotute an kawm bakah school-a zirlaite nen hun an hmang ho bawk.
School Education minister Dr Vanlalthlana ruahmanna in, Science Promotion Wing SCERT leh Zoram Intellectual, Space, Science & Technology Association tangdun buatsaih ‘school outreach programme’ chu Zirtawpni khan Govt. Republic HSS & Govt. Republic HS-ah IIT Madras & NIT Mizoram-a professor leh zirlaite hian an hmang.
NIT Mizoram dean (Academic) Dr Sukanta Roy chuan NIT Mizoram chu India rama zirna in tha pawl a ni, tiin, Mizoramin 50% quota a nei a. Mizo naupangte chu he quota hnawhkhat thei khawpa tang turin a fuih.
IIT Madras professor of Philosophy Prof. Sudarshan Padmanabhan chuan India rama zirna in tha ber IIT (No.1 IIT ranking) a lut thei khawpa inzir turin naupangte a sawm a. IIT luh theihna atana kawng pawimawh a sawi. SCERT deputy director (SPW) F Lalliansanga chuan Mizorama science leh mathematics zirna tih hmasawnnana department hmalakna leh naupangte hamthatna hrang hrang a sawi bawk.
IIT Madras leh NIT Mizorm zirlaite hian an tawnhriat atangin India rama zirna in tha zawka luh dan kawng an kawhhmuh a. Thiamna dik tak nei tur leh JEE/JEE advance /NEET paltlang theihnan NCERT textbook a rintlak ber tih an sawi a ni. High school zirlaite hian an hriat duh leh zawhna dang an neihte an zawt a ni.
IIT Madras zirlai 12 leh NIT Mizoram zirlai 15 hian New India Mission hnuaiah ‘Technology and Rural Development’ tih thupui hmangin 2025 January 9 thleng internship an ti ho dawn a. Hemi chhung hian zirlaite hi group 4-ah inthenin khaw hrang hrang an tlawh anga, an thiamna hmanga puih dan an zawng dawn a ni.