Tehran khawpuiah Hamas leader Ismael Haniyeh tihlum

Nikum October 7-a Hamas tena Israel ram beia mi 1,200 chuang nunna an lak hnu khan Israeli Defence Minister Yoav Gallant chuan Islamist militant group leader te chu “Thih hun nghakin an awm mek” tiin a sawi a. Tel Aviv-a Gallant office-ah chuan Hamas leader-te Ismail Haniyeh, Political Bureauof Hamas chairman thlalak pawh telin a intar a, Haniyeh hi tun hnaiah Qatar ramah a cheng thung.
Thawhlehni khan Haniyeh chu Tehran-ah Iran president thar Masoud Pezeshkian lakluhna neihnaa tel turin a kal a. Iranian leader te nena an inhmuhna thlalakte pawh pholan a ni a.
Nilaini zing khan Islamic Revolutionary Guard Corps te chuan thuchhuah siamin haniyeh leh a Iranian bodyguraf te chu ‘Zionist entity’ (Israel sawina) tena an beihna avangin an thi tiin thuchhuah an siam a. Hamas te pawhin Haniyeh chu Tehran-a a thlenna hmunah luhchilha tihhlum a ni, an ti bawk.
Haniyeh chu Hamas hruaitu pawimawh ber anga ngaih a ni a, mahse Gaza-a Hamas-te thuneihnaah engtiang chiahin nge a inrawlh thuk dan hriat a ni lo va. Gaza a Hamas leader Yahya Sinwar ang bawkin Haniyeh chu kum 1980 chhova Hamas tena radical operation an neihnaah inhnamhnawih niin Israelis te pawhin tum tam an man tawh a ni bawk.
Kum 1992 khan Israel jail atangin Hamas leader dangte nen southern Lebanon a no-man’s land-ah chhuah zalen an ni a. A kum leh lawkah Gaza-ah let lehin Hamas organisation-ah a thleng sang chak hle a, Hamas spiritual leader Sheikh Shmed Yassin chuan kum 1997 khan movement leader ni turin a ruat a. Sheikh Yassin chu March 2004 khan Israel strike vangin nunna a chan a ni.
Kum 2006 khan Palestinian Authority te chuan West Bank leh Gaza-ah parliamentary election neiin Haniyeh chu Parliamentary leader of Hamas atana thlan a ni a. Islamist group te chu mak taka hnehna chanpuiin ‘Prime Minister of the State of palestine’ a ni zui a. Mahse, West lama Palestinian Authority financial backers te chuan Hamas kaihhruai sorkar chu an thlawp duh lo va, Israel pawhin a pawm hek lo. Hamas-te chakna chuan Fatah, Palestinian Authority President Mahmoud Abbas party pawh a barakhaih hle.
Fatah leh Hamas te an inmil lo zui a, President Abbas chuan Haniyeh kaihhruai Hamas sorkar chu kum 2007 khan a thiat zui a. Haniyeh chuan Abbas thupek chu pawm lovin Gaza-ah rorelna lekkawh zui zelin, Fatah te chuan West Bank-ah Palestinian Authority an kalpui ve thung.
Kum 2017 khan Haniyeh chuan Hamas leader nihna bansanin Sinwar chuan thuneihna a chang ve leh ta thung a. Hemi kum vek hian Haniyeh chu chairman of Hamas’s Political Bureau atan Khaled Meshal thlakin ruat a ni a. Kum 2018 khan Qatar ah inbunin Doha ah office a nei a. Qatari capital atangin Tehran, a thih thlengin Hamas political operation a kaihruai a ni.
Israel chuan Iran-in Haniyeh thattu tia a sawi chu a pawm thu emaw a hnawl thu emaw a sawi lo. Ram danga chetlakna kaihhnawihah Israelin sawi a nei ngai lo va. Iran tan chuan an capital ngei maia an president thar lakluh hnu lawka Hamas chief tihhlum chu zahthlak a tling thung.

Fapa pathum chan
Haniyeh fapa pathum – Hazem, Amir leh Mohammad te chu April 10 khan an chuanna car Israel missile-in fuhin tihhlum an lo ni tawh bawk a. Haniyeh chuan a tute pali hmeichhia pathum leh mipa naupang pakhat a chan tel bawk.
Haniyeh chuan Israel-in a fapate chu Hamas fighter group-ah an tel a tih chu hnawlin ‘thil dang zawng aiin Palestinian interest a pawimawh zawk’ tiin a fa te thihna chungchang an zawhna a chhang a ni.
Mipui hriata hriam tak taka thusawi a nei chungin Arab diplomats leh officials te chuan Gaza a hardliner te aiin sawipui theih zawka an ngaih a ni a.
Haniyeh leh Khaled Meshaal te chuan Qatari kaihhruaia Israel leh Palestinian tena lung in tang an inthleng theihna tur leh Gaza-a tanpuina thawnluh a nih theihna turah hma an la nasa hle bawk.
Israel chuan Hamas leadership-te chu firfiak tia a sawi te niin Haniyeh, Meshaal leh midangte chu Hamas terror organisation thuikhawmtu tia a sawi te an ni.
Nikum October 7 a Hamas tena Israel an run kha Haniyeh-an a hre lawk em tih a chiang lo va. Gaza-a Hamas military council te chetlakna khan Hamas official thenkhatte chu a barakhaih hle tia sawi a ni bawk.
Sunni Muslim Hanityeh khan Hamas fighting capacity a tichak hle a, Shi’ite Muslim Iran nena inzawmna tha siamin chu chu thuruk pawh a ni hek lo.
Gaza-a Haniyeh an Hamas top leader nihna a chelh chhungin Israel chuan Hamas te chu humanitarian aid pekluh te Hamas military wing tana hmangah an puh bawk.

Shuttle diplomacy
Kum 2017-a Haniyeh-an Gaza a chhuahsan khan Israeli lung ina kum sawm hnih chuang tanga kum 2011-a Haniyeh hmalaknaa lung in tang inthlenga chhuah Yahya Sinwar chuan a thlak a.
“Haniyeh hian Arab sorkar te nen Hamas political battle-ah hma a hruai a ni,” tiin Adeeb Ziadeh, Qatar university a Palestinian affairs specialist chuan a sawi a. Hamas a hardline figure leh military wing te nen inzawmna tha tak an nei a ti bawk a. “Hamas te tana political leh diplomatic lama sulsutu ber a ni,” tiin Ziadeh chuan a sawi.
Haniyeh leh Meshaal te chuan inkahhai a awm theih nana hmalatu Egypt official te hmuin hma an la bawk a. Nikum November thla khan Haniyeh chuan Iran supreme leader Ayatollah Ali Khamenei hmu in Iran a tlawh tawh bawk tiin iranian state media te chuan an sawi.
Chumi tum chuan Khamenei chuan Hamas leader-te hnenah Hamas tena Israel an beih tur thu an hrilh lawk hmasak loh avangin indonaah inrawlh a tum lo tiin a lo hrilh tia sawi a ni bawk.

Eng vangin nge Haniyeh an Hamas a zawm?
A tleirawl laiin Haniyeh chu Gaza city a Islamic University-ah student activist a ni a. Kum 1987-a First Palestinian intifada(uprising) kalpui tum khan Hamas a zawm a. Man niin hun rei tak tantir a ni bawk.
A hnu lawkah Haniyeh chu Hamas fintu Sheikh Ahmad Yassin thuihruai ber a ni zui a. Kum 1994 khan Haniyeh chuan Yassin chu Palestinian thalaite tan role model a ni tiin a sawi a. “A hnen atangin Islam hmangaihna te, Islam tana inpekna te, nunrawng te hmaa kun miah loh tur tih te kan zirchhuak a ni,” tiin a sawi.
Haniyeh kha Hamas tena politics an luhchilh tul titu a ni bawk a. Kum 1994 khan political party an din chuan hmasawnna kal zelah Hamas te chak zawkin a siam dawn a ti.
Kum 2012 khan Reuters ten an kawmnaah Hamas te chuan armed struggle chu an bansan dawn em tia an zawhna chu Haniyeh chuan ‘dawn lo’ tia chhangin kawng tinrengin popular resistance, political, diplomatic leh military resistance kan kalpui zel ang, a ti a ni.

Iran-in phuba la dawn
Iranian President Masoud Pezeshkian chuan Israel chuan dawihzep taka Haniyeh a tihhlumna chu a la inchhir dawn tiin a sawi a. Iran chuan a territorial integrity te chu a humhim tlat dawn a ti bawk.
Iranian president chuan Haniyeh chu ‘hruaitu huaisen’ tiin a sawi bawk a.
Iran supreme leader Ayatollah Ali Khamenei pawhin Haniyeh thihnaa phuba lak chu ‘Tehran duty a ni’ tiin a sawi bawk a. Israel chuan hremna na tak a hmachhawn ang, a ti bawk.
Haniyeh thihna chuan Middle East-ah buaina nasa zawk a chawhchhuah hlauhna a lian hle a. Arab ram hrang hrangte chuan Haniyeh thihna chu an dem thu an sawi hlawm bawk a. Inremna a awm theih nana inbiakna pawhin harsatna a tawh phah ngei dawna ngaih a ni bawk.