TENDER RATE CHUNGCHANG

Er. K. Lalsawmvela MES Retd

Tunlai hian hna chi hrang hrang tana tender chhuah a, thuneituten tender chhangtute zinga a chhang sang lam an lak thin avangin sawi a tam ta viau mai a. Hemi chungchangah hian mipuiten thil kalhmang kan hriat chian theih nan thil kalphung ka hriat dan han tar lan ve tulin ka hria a, ka han ziak ve a ni. Tender chungchang ka sawi tur hi chu ‘Works Contract’ bik a ni tih ka sawi chiang duh bawk a ni.
Mizoramah hian Project chi hrang hrang awmin, pawisa petu (funding agency) azirin Contract Document/Bidding Document hrang hrang awmin, heng hi an inang vek lo va. Pawisa petu document ang zel chu kan hman tur a ni ta a; kan duh ang ang kan hmang thiang lo. Chung document kan hman tlangpui chu: External Aided Project atan FIDIC document, National Highway atan Standard Bidding Document, Ministry of Road Transport & Highways, PMGSY atan R.D Standard Bidding Document leh Building works atan CPWD Standard Bidding Document/ CPWD Works Manual hi State PWD chuan a hmang a.
Tender rate chungchangah chuan World Bank leh ADB chuan pawm theih chin engmah an sawi lova. A chhangtu zinga tehfunga tling zingah a chhang hniamber thlan tur a ni ringawt mai a. Tender amount (Scheduled rate hmanlai) aia sang pawh nise, a hniamber anih chuan an pawm mai a. National Highways-ah chuan 10% a hniam thleng chuan engmah sawi lovin, ’contractor hlep tura dah a chan huam a ni mai’ an ti a; chumi aia hniam leh erawh chu a hniamna atang khan additional security contractor-in a dahkham a ngai a. PMGSY-ah chuan, rate chungchangah a neitu (Employer) thu a dah a nih avang leh pawm theih chin tuk ngawt chu dan mit (Eye of Law) atangin a rem si loh avangin PWD Secretary-in Notification tichhuakin, 5% aia hniam chu, a hniamna atanga additional security lak turin ruahman a ni a. Chawi belh a tam avangin hniam takin an chhang ngam lem lova. Tender kalphung angin competition tha takin a awm thei a. World Bank/ADB, PMGSY , N.H leh Central Project reng reng chu Online tender vek anih bawk avangin harsatna awm lovin a hniam apiang lak zel a ni a; Bank lam leh Central lam atang pawhin an sawisel ngai hauh lo.
CPWD Works Manual hlui, hun rei tak lo hman khan tender rate chungchang a sawi dan chuan: Tender amount/SoR atanga 5% thlenga danglam (variation upto 5%) chu ngaithah (ignore) mai tur a ni a; tul bik riau leh pawimawh bikah chuan 10% thleng pawh pawm theih a ni (variation upto 10% may be allowed) tih a ni. Tunhma atangin rate chungchang hi ka buaipui nasa khawp a, a hre deuh ho ka rawn tam bawk a. World Bank Contract thubuai kan neiha kan Arbitration Lawyer chuan, “Manual hian rate hniam lam a veng lova, a sang lam chauh a veng a. A chhan chu, rate a san chuan Sawrkar sum a hek a, sanction aia senso a tam theih vang a ni. Bazaar-ah i kal a, i thil lei duh engkima inang vek 3 lo awm zingah pakhat Rs.1,000, a dang Rs.950, a dang leh Rs.900 man niin, i pawisa a lei tur a ni a. Eng ber nge i lei ang ?” tih entirna a sawi a. Heta tanga chiang tak chu, neitu chan changa hna thawk tan chuan eng hna pawh ni se, tender chhangtu zing ah, hna ngai reng thawk tur atan chuan a chhang hniamber thlan ngei tur tih a chiang viau mai. A chhang hniam zawk awm reng laia a chhang sang zawk pek tlat chu dan kalh a niin, ‘neitu chan chang lo rilru pu’ a tih theih hial awm e.
CPWD Manual emaw, eng document mah hian tender chhang hniam ber ni lo thlan dan an sawi hauh lova. CPWD Works Manual thar 2022 a mi erawh chuan a hlui angin tender rate pawm theih dan chin engmah a sawi ta lova, National Highways leh PMGSY kalphung ang deuhva kal tur a ni ta a ni. Manual-a chuang ni lo, CPWD General Rules & Direction-ah chuan, “Tender chhangtu 2 emaw, a aia tamin emaw rate hniamber in anga an chhan chuan, a hniamber rate in ang ho chauh khan an chhan turin tender chhuah leh tur a ni a; chumi hnua inang an la awm fo chuan a bialtu SE, EE leh Contractor te awmlai ngeiin thumvawr-a thlan mai tur a ni” tih a ni. Contractor rate hniamber kha Schedule Rate hmanlai aia a san viau chuan ti hniam deuh tura biakrem(negotiate) theih a ni a; mahse a hniamber chauh sawipui tur a ni leh bawk. A chhang sang kha a hniamin i thawk ngam em ? tia biakrem phal a ni lo. Rate sangber thlan dan erawh chu khawiah mah inziak a awm lova; India ram State dangah pawh an practice ngai loh a ni. A chhan chu Dan Mit (eye of law) kalh a nih vang a ni.
Chutih lai chuan, tender chhang hniamber thlan loh dan pakhat Manual a chuang a awm a. ‘A chhang hniamber kha a inhnukdawk a nih chuan emaw, document tul a theh luh kim loh etc(non-responsive) emaw a nih chuan, tender a thar a chhuah leh mai tur a ni’ tih a ni a. Mahse hna hmanhmawh avang leh a hniamber dawttu rate kha a san vak chuan loh chuan pawm mai a tul ve bawk thin. Hriat leh atana tha chu, tender chhangtu chu engzat pawh nise, mi pakhat chauh tender a nun chuan ‘Single Tender’ a nih avangin pawm theih a ni lova, tender that leh mai tur a ni” tih hi World Bank/ADB, Highways leh PMGSY kalphung chu a ni a. CPWD Works Manual erawh chuan, a bu chhung lama sawi lem lovin, Annexure to SoP-ah open tender-a single tender E.E in Rs.25 lakhs thleng, SE-in Rs.500 lakhs thleng leh CE-in Rs.15 Crores thleng pawm thei turin a dah thung a.
NHIDCL hna te, State PWD hnuaia N.H -ah te, PMGSY hnaah leh Central Project dangah te hian Contractor hian Schedule of Rate hmanlai aia 10% atanga 30% laia hniamin an chhang thin a. Vaiho Contractor hi an chhan hniam chhan ka zawh chuan, “Hna thawhna tur khawl engkim tam tak kan nei sa reng a, an awl mai mai ai chuan rate hniam deuhva thawh pawh hian kan hlawk zawk” an ti thin. Road Division EE ka nih lai khan Contractor pakhat hian Retaining wall tender kha 15% laia hniamin a chhang a. Amah kova ka zawh chuan, “Quarry ka nei a, motor ka nei a, ka fapa hi lung mistiri a ni a, ka thawk thei ang” a ti a. Min hmin khawp mai a, ka pe ta a. A thawh laiin ka va en ngat a, tha takin a lo thawk a, ka inchhir lo viau.
Rate hniama contractor tam takin an thawh theihna chhan chu: Rate chawh chhuahna (Analysis of rates)- buatsaih hian khawl hman tul zawng zawng chu midang ta man chawi a hawh (hire) tura chhut vek a. Chutianga rate chhut chhuah atang chuan Contractor hlep tur 10% leh Office leh camp siam nan, hna thawk tura in buatsaihna (mobilization) etc atan, a hna azirin 5% – 10% belh a ni thin a. Tichuan, khawl hire man tur pawh tela rate siam hnuah 15% vel belh leh a nih avang hian mahnin hmanrua an neihsa chuan rate hniam deuh pawha an thawh hian hlep an nei tho tihna a nih chu.
Heng hi rate hniam ka sawimawina a ni lo va; Rate hniama contractor-in hna an hmuh hian quality-in a tuar thei a, supervision a hautak thin a, hnain a tuar thei a, thil duhawm a ni lem lo. Mahse duh duh (arbitrarily) a rate tur tuk (fix) ngawt hi dan kalh a ni a. Sawrkar apiang hian party worker te duhsaka hna pek duh theuh a niin, tunhma pawhin an ti a, tun ami pawhin ‘danglam’ bik lovin an ti mek niin a lang a. Kan induhsak a nih pawhin dan mit atanga him tura tih hram hram a tha khawp mai. Tuna kan Sawrkar kaldan ang hi chuan (ka Contract Specialist/Advocate thian min hrilh dan ang chuan) Contractor tu pawh Court-a an kal phawt chuan awlsam tea thiam chan theihna a ni. Contract Agreement ziahfel vek tawh, a neitu remtihna tel lova thiatsak emaw, tih danglam sak ngawt pawh hi dan kalh bawk a ni.