Tennis a ranking point hmuh leh hloh theih dan

Thawhtannia ATP Ranking tihchhuah tharah Novak Djokovic chu World No. 1 thar a ni leh ta.
Miami Open khelh zawh takah World No. 1 ni lai Carlo Alcarez chuan final a lut zo lova, semi-final-ah a tla. Alcaraz hian No. 1 ni chhunzawm turin Miami Open-ah champion ngei a mamawh a, final a luh zawk tak loh vangin a dinhmun a hum zo lo. Semi-final-ah a tlak tak si vang hian ranking point a neih mek 7420 atangin point 640 paihsak a ni a. Miami Open hmachhawn ve thei lo Djokovic chuan ranking point a neih mek 7160 a humhim thung a, Wolrd No. 1 a thar a ni leh ta a ni.
Grans Slam ah vawi 22 champion tawh Novak Djokovic hi Tennis player – mipa leh hmeichhia zingah World No. 1 ni rei ber a ni mek a. Record khum harsa tak tur siamin, a record a tihzau belh zel.
Ranking Point thlir zauna
ATP leh WTA ranking point pek dan leh point an paihsak dan hi hriat fuh loh palh awm thei tak a ni. Hliam vang leh chhan dang vanga inelna hmachhawn thei lova awl mek, ranking point hmuh belh miah loh ten inelna hmachhawn mekte ranking point-ah an lehpelh chang a awm fo thin. ATP ranking thar berah pawh hian Miami Open hmachhawn thei lo Novak Djokovic chuan Miami Open semi-final lut, World No. 1 ni mek bawk Carlos Alcaraz a lehpel daih a, World No. 1 a ni a ni zui leh. Hengte hi eng vanga awm thei nge a ni tihte kan sawi fiah ang.
Tennis-a inelna hrang hrangte hian ranking point an keng tel hlawm a. Inelna hrang hrang; ATP Tour 250, ATP Tour 500, ATP Tour Masters 1000 leh Grand Slam te hian ranking point an keng tel thliah thliah a. Point 2000 hmuh theihna Grand Slam tih loh zawng hi chu number awm zat hi he inelnaa ranking point hmuhsan theih ber tihna zel a ni nghal. Grand Slam’ tia an sawi, inelna lian zual pali; Australia Open, French Open, Wimbledon leh US Open te hian ranking point 2000 hmuh theihna te an ni. Grand Slam tih lohah chuan kum khata chetha zual pariatte inelna ATP / WTA finals in ranking point a keng tam ber a. ATP/WTA finals a champion tan point 1500 a hmuh theih. Grand Slam hi inelna lar ber a nih vangin kan sawi fiah tur sawi fiah nan kan hmang zui ang.
1. Ranking Point hmuh theih dan:
Tennis player Grand Slam la khel phak ngai lo ten Grand Slam an khelh phakin ranking point-ah point 10 an hmuh belh nghal a. Round of 64 thleng phakin point 45 an hmu a, round of 32 thleng chin ten point 90, round of 16 thleng chinin point 180. Quarter-finalist in point 360. Semi-finalist in point 720, pahnihin point 1200, champion in point 2000 an hmu thin. First round atanga final thlenga an point hmuh zawng hi belhkhawm tur erawh a ni lo thung. An thlen china point awm zel kha an hmuh tur a ni.
A chunga kan tarlan ang khian inelna tenau zawkah pawh first round atangin ranking point hmuh tur a awm thliah thliah thin a. Chu chu ranking point an hmuh thin dan a ni.
2. Ranking point loh dan.
Lala chuan Grand Slam pakhat US Open 2023-ah a champion vangin ATP ranking-ah point 2000 a lo hmu ta a. Lala hi 2023-a a champion na US Open-ah hian 2024 ah a champion leh a nih chuan ranking point 2000 a hmuh belh tawh hran lova, 2023-a point 2000 a hmuh kha a humhim chauh zawk. 2023-a a champion naah hian a champion zo tawh lo a nih chuan point 2000 a lo hmuh tawh atang khan a thlenna china point a hmuh kha paihsak a ngai tawh zawk thung. Final-ah a chak zo lo a nih chuan pahnihnain a hmuh tur point 1200 atangin 2000 paih tur a ni a. 2000 atanga 1200 paih hnua chhuak point 800 hi ranking point a neih mek atangin paih leh chhawn tur. Entirna; Lala’n ranking point a neih mek kha 5000 lo ni ta se, 5000 atangin 800 an paih ang a, ranking chhuak thara a point chu point 4200 a ni tawh ang. First round-ah a tla nghal a nih chuan -1990 a ni ang a. Ranking point a neih mek 5000 atangin 1990 paihsak a ni ang a, ranking thara a point hmuh tur chu point 3010 chauh a ni tawh ang.
Miami Open 2023 ah khan No.1 ni lai leh 2022 champion Carlos Alcaraz chuan semi-final a paltlang zo lova. He inelnaah kum hmasa ranking point a hmuh point 1000 atangin semi-finalist point an hmuh 360 paih a ni a. Chuta chhuak point 640 chu Ranking point a neih mek point 7,420 atangin paih a ni ve leh a. Tichuan ranking chhuak thara a point hmuh chu point 6780 a lo ni ta a ni. Alcaraz point a danglam lai hian inelna hmachhawn thei lova Arbawm lo tah Djokovic-a’n ranking point a neih mek point 7,160 chu a danglam ve ta si lova, Alcaraz lehpelin No.1 thar a ni leh ta daih a ni.
ATP leh WTA ranking thar hi thawhtanni a zel tihchhuah thar a ni thin a. Inelna neih hnuhnung berin ranking a sawi danglam theih thin vangin inelna hnuhnung ber atanga thawhtanni ah ranking thar tihchhuah a ni thin.