Texas sabereka khuangkaiha thi mi 100 tling tawh

Texas sabereka khuangkaiha thi mi 100 tling tawh
Zirtawpni kal taa Texas lailia sabereka khuangkaih thawka thi chu mi 100 chuang an ni ta a, chin hriat lohvin mi engzat nge la awm pawh hriat a ni lo.
Mi chhanchhuah leh zawn hna thawktute chuan heng lai velah hian ruah a la thawk dawn tih inralrinna tihchhuah karah lui kama chirh karah an la thawk chunzawm zel a; mahse, ni li a liam tawh avangin dama inhmuh leh beiseina a chau sawt hle.
Kristian hmeichhe naupangte nipui camp neihpuitu, Camp Mystic chuan an hnuaia thawk leh hmeichhe naupang 27 an thi tih an nemnghet tawh a, naupang 10 leh camp counsellor chin an la hre lo.
Kerr County-a Guadalupe River lian thutin Zirtawpni zing khaw var hmaa ruah sur nasa tak avanga chhiatna a thlena thi 84 vel zinga 56 chu puitling niin 28 chu naupang an ni.
Puitling 22 leh naupang 10 chu tute nge an nih hriat theih an la ni lo tih county sheriff pisa chuan a sawi.
Camp Mystic chuan Thawhtanni khan chhiatna thleng pawi an tih thu an sawi a. A neitu zinga pakhat leh director ni mek, kum 70 mi, Richard Eastland-a pawh naupang chhan a tumna lamah a thi ve niin Austin American-Statesman-in a tar lang.
NWS-in an khaw thlir a tihchhuahah heng lai vel hi ruahin a la pan mek a, tui a la lian zual thei niin an la sawi lawk.
He chhiatna thleng pawi tia sunna thu thawn chhuak an tam hle a. King Charles III chuan President Donald Trump-a hnenah tui lian rapthlak tak avanga chhiatna an tawh chu pawi leh lungchhiatthlak a tih thu a thawn.
King hian an hmangaihte chântu chhungkuate chu a thinlung takin a tawrhpui a ni tih Washington-a British Embassy chuan a tar lang.