A kut veilam ruh a tliah hnua grand prix vawinga ngawt bawhpelh tawh Alpha Tauri driver Daniel Ricciardo chuan a hliam thawhsanin kartawp United States Grand Prix-ah car a khalh leh thei dawn ta.
Kum 34 mi hi August ni 25 khan Dutch Grand Prix practice laiin a chesual a, hun engnge-mawchen a chawlh vang vang hnuah Texas state khawpui Austin tlankawngah Formula One inelna a hmachhawn turin a irleh dawn a; he thu hi Alpha Tauri team thupuangtu chuan BBC Sport hnenah a nemnghet.
A hmain Alpha Tauri leh he team neitu Red Bull lamin US tlankawnga Ricciardo kir tur thu hi an la sawichhuak ngai lo a; Qatar race an tlan lai dawn khan Red Bull chuan a hliam atanga ngai awh turin Ricciardo chuan hun a la mamawh deuh dawn tih an puang a, dam chiang lo chunga risk an tum loh thu an sawi.
Tun Pathianni kalta khan Ricciardo hian Instagram lamah video post siamin, car a khalh chhuah leh theih tawh thu leh Nashville, Tennessee lamah Red Bull car khalhin a leu kual leh thei tawh tih a lantir a, Austin chu a tlankawng ngainat a nih thu leh chu hmun ngeia inhmu turin fans hnenah thu a lo than lawk tawh a ni.
Grand Prix vawiriat laia chak ve tawh Ricciardo tan kartawp intlansiak hi kumin July thla Hungarian Grand Prix hmanga F1 race a luhchilh hnua race a hmachhawn vawithumna tur niin, tun season kal laiah hian Red Bull reserve driver niin bul a tan a, hliamin a tlakbuak zui ta a ni.
Kum 2022 tawp ruala Mc-Laren lamin an hnawl tak Ricciardo hian Red Bull-ah kum khat daih reserve driver niin contract la nei mah se nakkum atang chuan Red Bull team tho Alpha Tauri driver a ni tawh tawh dawn tih nemngheh a ni.
Alpha Tauri behchhana a F1 season hmasaber hmang mek Dutchman Nyck de Vries chuan teamneitu Red Bull beisei a phak loh avangin season kal laia intlansiak vawi 10 an zawh hnu khan Ricciardo hi reserve mai ni loa grand prix hmachhawn turin an chhotir a, mahse, Netherlands lama a inhliam leh tak avangin New Zealander Liam Lawson chuan Netherlands, Italy, Singapore, Japan leh Qatar-ah khan a hmunruak a luah a, a chetha phian a, season thar atan Alpha Tauri reserve driver ni turin an senglut fel tawh nghe nghe.
Texas tlankawngah hliam thawhsan Ricciardo kan hmu leh tawh dawn
Get real time updates directly on you device, subscribe now.
Next Post