Thaha vauna a dawn hnuah Salman Khan venhimna an tipung

Thaha vauna a dawn hnuah Salman Khan venhimna an tipung
Bollywood superstar Salman Khan chuan e-mail-ah thaha vauna a dawng a, he invauna hi an ngai thutak hle a, Mumbai police te pawhin Salman venhimna lam an tipung nghal a, he invauna avang hian police te hian gang hotupa Lawrence Bishnoi leh Goldy Brar te lakah FIR an ziak lut tawh bawk. Salman Khan venhimna lama thawk turin Assistant Police Inspector (API)-rank officer pahnih leh constable pariat atanga sawm velin an veng tawh dawn niin report a awm a, amah ngaisangtu (fans) te pawh a Salman-a chenna Galaxy Apartment, Bandra tuala an punkhawm phal a ni tawh lo bawk.
Salman Khan hi a hmain Y plus category venhimna police-in an lo pe tawh a, bullet-proof car leh personal security guard venhimna hnuaiah a lo awm tawh a, tunah chuan venhimna lam hi police-in an puibawm dawn ta a ni.
Salman Khan-a office email-ah thaha vauna thawn a ni a, he email thawntu ni a ngaih Bishnoi leh Brar bakah Rohit te lakah FIR ziah lut a ni a,, police-te chuan FIR hi Prashant Gunjalkar-a complaint theh luh behchhana an ziah niin an sawi a, Prashant Gunjalkar hi Salman-a management company a hotu pakhat a ni.
Inrinni kalta khan Gunjalkar hian Salman Khan office a tlawhnaah email pakhat ID ‘Rohit Garg’ hnen atanga dawn chu hmuin, chu email-ah chuan Salman Khan hian tunhnai lawka news channel-in Bishnoi an kawmna chu a lo la en lo a nih chuan lo en ngei turin a rawn ti a. Salman Khan hian an buaina chinfel a duh chuan Goldy nen hmaichhana inbe turin a ti a, “Hun a la awm a, mahse, a dawt lehah chuan a barakhaih tawh viau ang” a ti.
Bishnoi hi Punjab jail-a tang mek a ni a, Goldy Brar nen hian zaithiam Sidhu Moosewala thattu a puh an ni. Salman Khan hian nikum June thla khan kutziak lehkha thawn, thaha vauna a lo dawng tawh bawk a ni.
FIR hi Indian Penal Code (IPC) hnuaia section 120-B (criminal conspiracy), 506-II (criminal intimidation) leh 34 (common intention) te tlawhchhanin ziah luh a ni.