Thaidawr Tlangah IR police dah rang turin MNYF-in ngen

Thaidawr Tlangah IR police dah rang turin MNYF-in ngen
Phuldungsei Thaidawr tlangah IR Police dah thuai turin MNF Thalai chuan Home minister an ngen.
MNF Thalai Hqrs. thuchhuak chuan, Zampui Phuldungsei-a MZP nawrnaa sawrkarin Thaidawr Tlanga Mizoram IR Police duty dah a tum thu Home minister-in a sawi chu lawmawm a ti a. A hmanhmawh thlak tawh avangin rang taka police hi dah turin an ngen tih a sawi.
Thaidawr tlang chungchangah hian Geological Survey of India, Mizoram sawrkar leh Tripura sawrkar aiawhte 2012 December 4-a thukhawm chuan thutlukna an lo siam tawh a. A tu ve ve mahin he tlangah hian sawrkar angin kut an thlak tur a ni rih loa, joint verification tiin a tha zaia chinfel tum tur a ni, tih a nih thu a sawi.
MNF sawrkar laiin Zampui Phuldungsei khua hi village council pek a ni a, polling station pawh dah zui niin, MNF sawrkar lai hian he tlangah hian kut thlak tumna a awm avangin Mizoram sawrkarin rang taka chet la in, Mamit district magistrate hmangin CrPC 144 a puang a, MNF sawrkar chhungin hma an rawn la zui lo tih a sawi bawk
‘Tunhnaiah he tlanga Tripura sawrkarin ngampa taka hma an rawn lak zui chhan hi, kumina Mizoram sawrkarin Phuldungsei khuaa Mizo 85 ration card a paihsak (delete) vang ni berin a lang. Heng mite hi Mizorama an ration card-te Adhaar nena online-a link nghet vek tawh leh authentification pawh tih vek tawh an ni,’ a ti.
Supply minister leh Supply department-in ration card an paihsak chu an dikna chanvo pelet a, a rang thei ang bera hma la turin Home minister hi an ngen MNF Thalai hian an sawi a ni.