Thailand-ah Move Forward-ten hma sawn takzet

Thai voters-te chuan an duh tichiangin rorel lai aiin Thailand institution te siam tha turin opposition te an thlang zawk.
Inthlan result chhiar mekah Move Forward te chuan lower house-a seat 500 awmah seat 151 an la ngei dawna ngaih a ni a.
Thailand party chak bera ngaih ex-prime minister Thaksin Shinawatra fanu kaihhruai mek Pheu Thai te aiin seat 10-in an la tam zawk a ni.
Analysts te chuan inthlan result chu ‘politicial earthquake’ tiin an sawi a, mipui ngaihdan nasa taka insawhsawn dawrhna tiin an sawi.
Chu mai bakah sipai nena inzawmna nei party pahnih te Prime Minister Prayuth Chan-ocha kaihhruai mek te chu an hnawlzia pholanna a ni bawk a. Sorkar lai mek coalition chuan seat 15% bak an la lo bawk a.
“Voters te hian ‘prayuth regime’ kalsan an duh a ni ber a, inthlak danglam an ngiat a ni ber,” tiin Prajak Kongkirati, Thammasat University a political scientist chuan a sawi a. “Mipui ten Move Forward tena inthlak danglam an aupui chu an thlawp a, beisei aia tamin an thlawp bawk,” tiin a sawi.
Thai social media-te chu Move Forward te lawmpuinain a khat tawh a, heng mite hian ‘organic canvassers’ intiin party chakna chu ‘wind of change’ tih leh ‘dawn of a new era’ tiin an sawi bawk.
“He inthlan hian kum li chauh a la liam tihah mipui rilru inthlak danglam nasatzia a pholang a, establihsment leh pro-democracy camp lam te an inthlak danglam nasa ve ve a ni,” tia sawiin, “Democracy hi a thlawna neih tum chi a ni lo” tiin an tarlang bawk a.
“Mipuite beiseina leh ngaihtuahnate mila an kal thei lo a nih chuan an chak lo zui leh mai ang,” tih a ni bawk.
Move Forward leader hi kum 42 chauha upa Harvard University graduate Pita Limjaroenrat a ni a, Thailand Prime Minister 30-na ni turin a inpeih thu a sawi nghal bawk a. “Beisei leh duhdan inang kan nei tlang a. |angrualin kan hmangaih Thailand hi tha zawkin kan enkawl thei a, vawiin atanga hna kan tan chuan kan thlak danglam thei a ni,” tiin a sawi.
Move Forward te hian Thailand bureaucracy, economy leh military te chu thlak danglam vek duh niin chumai bakah monarchy te humhimna dan pawh ennawn duh ngat niin tun ang ema mipui tena an duh hi ngaihtuah phak piah lam tia sawi theih tur a ni.
Mahse kum 2020 atang khan sorkar chet danah te leh hmalaknaah te lungawilohna awm reng tawh a ni a, khang movement kalpuiah te khan tuna Move Forward leader te hi a sulsutu te an ni a. Chumai bakah thalai vote nei tharte chu Move Forward thlawp bur te an ni hlawm bawk a.
|halai rual tena an bawh nasa em em chu an chakna anga ngaih a ni a. A hma atang rengin Thai social media-te chu Move Forward kaihhnawih thilin a luahlan hneh hle a ni.
Thailand danah voters ten political party an thlawp zawng te langsar taka an sawi leh lantir phal loh a ni chungin Pathianni khan thalai rualte chuan Move Forward an thlawpna an lantir nasa hle a. Tam tak te chuan Move Forward campaign nana color an thlan orange kawr, flip flops leh sneaker te an bunin an pholang nasa hle a ni.
Move Forward candidate-te hian an elpuite angin sum an neih ve loh avangin social media chu an innghahna a ni a, a chang chuan bicycle te hmangin campaign te an nei thin a, mahse, chungte chuan an vision chu party dang te aia chiangin a pholantir zawk tia sawi a ni.
Move Forward te chuan kum 2014 military coup hnua inhnamhnawihna nei party te pakhat mah a inzawmpui duh lo bawk a, politics lama la inhmang ngai lo mithar rual tena an kaihhruai a ni bawk.
Thailand-ah hian kum 26 chin hnuai lam voters mipui vote nei maktaduai 52 atangin 14% chauh an ni chungin heng thalai rualte hian kum upa lam tena Move Forward an vote theih nan an campaign nasa hle bawk.
Zawhna lian tak awm mek erawh Thai mipui ten an duh zawng chiang taka an lantir chungin reformist party te chu sorkar siamtir remtihsak an ni ang em tih a ni.
Thailand senator 250 te chu PM Prayuth kaihhruai meka military government ruatte vek an ni a, sorkar thar duhthlang thei tura vote nei vek an ni. Hei vang hian Move Forward -Pheu Thai coalition te chuan lower house-ah tang dunin seat 60% chuang nei mah se an duh chuan an dang chat der thei thung.
Mahse, Move Forward-Pheu Thai te hian party lian ber pathumna Bhum Jai Thai te seat 70 lai nei te chu an thawhpuinaah la lut se chuan senate-ah thuneihna an chang thei thung ang.
Military coup chu a thleng rih lo a ni a, mahse court chuan technically in Move Forward te chu a disqualify zui thei tho a, a hma pawhin kum 2020 khan Future Forward te a disqualify tawh bawk. Kum 2019 inthlanah hian seat la hnem ber an ni a, mahse, Thailand royalist establishment, military officers, senior bureaucrats leh judges rual te inthurual chuan an hnawl der a ni. Constitutional Court chuan Future Forward party chu a thiat zui nghal a, an leader te pawh politics an khelh a remti lo zui nghal bawk a. An MP hmun thuma thena hmun khat hloh zui nghal bawkin chuta tanga indin tha leh Move Forward chu parliament-ah riang takin opposition awm chhun angin an awm a ni.
Mahse, Move Forward te chu thalai ten an bawh tlat a, an leader Pita Limjaroenrat chu prime minister atana itawm berah a inhlangkai zui thei bawk.
Zawhna awm ber chu Move Forward leh Pheu Thai te parliament hnuhnung bera inzawmna nei tha lo tak te chu an thawkdun thei ang em tih zawk a ni.
Move Forward tena auhla an neih ber te hi Thailand establishment te tana huatthlala tak vek a nih avangin lawmtu leh tantu an ngah rual chiahin chhia se duhtu an tam hle tho bawk.
Move Forward te chuan Thailand kalphung leh system te chu thlak danglam leh siam that vek ngaiah an ngai a, sipai thuneihna sang lutuk te pawh an duh lo, chung te chu sipai ten an ngaithei ang em tih te pawh zawhna a ni.