Thalai zingah ganja a hluar

Mizoramah ganja a hluar a, police leh excise department te leh ruihhlo dona lama inhmangte chuan an vei hle. Ganja hluarzia hi mipuiin an la hre tawk lovah an ngai.
Mipuiin ganja hluar thu an hre tawk lovah an ngai a ni mai lo a, nu leh pate’n an fate him loh dan an hre lo a, ganja zu thinte hi ganja an zu thin tih an nu leh pate’n an hre lo niin an hre bawk.
Ganja hluarzia tilangtu pawimawh chu Mizoram Excise & Narcotics (MEN) department te’n an man zat hi a ni ang; nikuma kum tluana an man kha kg 179.233 a ni a, kuminah October ni 31 thleng khan kg 561.725 an man tawh.
Kuminah May thla thleng khan kg 406.719 an man a, hetiang zat hi a hmain kum tluan pawhin an la man ngai lo. May ni 31-ah khan kumin hi ganja an man hnem ber kum a ni tawh. 2014-ah khan kg 402.227 an man a, a hma chuan hei hi an man hnem ber kum a ni thin.
MEN department hotute chuan ganja a hluar thu hi an sawi a, thalaite zingah intihhmuh an awm thu, tleirawl, kum lama la naupang tak takte pawhin an intihhmuh tih te an sawi.
‘Meizial zukin an zu a, thil tisuala inngai lova zu mai an awm a, an chhungte pawhin an hre lo ang,’ MEN department hotu pakhat chuan a ti a, ‘Rui buai chuang lova a ruka zu hi an tam a ni,’ a ti bawk.
Dr C Lalhrekima, psychiatrist pawhin ganja vanga harsatna tawk an awm thin thu a sawi a, a that lohna leh a hlauhawm dan inzirtir a tul thu a sawi.
Mihringah a thawh dan a inan loh thu a sawi a, atpui lo, mahse harsatna tawh phah an awm thu, an tawn chinah pawh vawi hnih khat leh zuk pawha anxiety nei te, panic attack nei te, chutiang chu an tawn thin thu a sawi.
“|halai zingah ganja pawina hre lo, khawi khawi atanga emawa damdawia hman theih nia sawi lo hre ve hialte kan awm thin a. Tun thlengin damdawia hmanna tur dik tak a la awm lo. A nghawng tha lo kan hmu hnem em em a, tih chhin hlek loh tur a ni,” a ti.
Atna a thlen thei tih a sawi a, rilru lam a nghawng a ni mai lo a, chuap leh lung a tichak lo a, taksa hriselna a tichhe thei tih a sawi bawk.
MEN department hotute sawi danin, tunlai thalaite hian ganja tia sawi lovin ‘weed’ tiin an sawi a, changkang ta riauvin an hria a, intih tunlai nana zu te an awm a, meizial nen ang khata ngaia inthiam lohna pawh nei lova zu te an ni nawk mai. An rui bung bung kher lo a, chuvangin an chhungte pawhin an hre lo thei viau tih an sawi.