Thalaite inzirna atan thuthlung siam
Labour, Employment, Skill Development & Entrepreneurship Depatment (LESDE) chuan nikhat awh tur, Mizo thalaite tih hmasawnna atan ‘Workshop on Promotion of Apprenticeship Training’ chu Zirtawpni khan Govt. ITI Aizawlah a buatsaih a. Ministry of Skill Development & Entrepreneurship (MSDE) leh LESDE leh Automobile Dealers Association of Mizoram (ADAM) ten thawhhona thuthlung, tri-partite agreement kum thum chhung atan an ziak nghal.
He hun hmanpuitu LESDE secretary Lalramsanga Sailo chuan ITI zirchhuakte leh Mizo thalaite tan apprenticeship training a pawimawh zia leh Mizoram bakah India ram chhungah hnathawh tur tam tak a inhawn thu a sawi a. Zirlaite chu chhawr tlak an nih theih nan taimak chhuah tur leh an thil zir kawngah thahnem ngai lehzual turin a fuih.
Regional Directorate of Skill Development & Entrepreneurship deputy director Ganesh Chandra Deka chu resource person-ah hman niin, zirlaite hnenah aprrenticeship chungchanga hriat tur a sawifiah a ni.
Inremna thuthlung angin ADAM Industry Cluster hnuaiah hian ITI zirchhuakte leh Mizo thalaiten training pahin hna an thawk anga, stipend an dawng dawn a ni. A kalpui dan tur hi ADAM chairman Lalhmangaiha chuan a sawifiah a ni.
Thalaite inzirna atan thuthlung siam
Get real time updates directly on you device, subscribe now.
Prev Post
Next Post