By Zoremi Hmar Zote
-- Advertisement --
Kum li kaltaah khan Tourism Minister, Pu Robert Romawia Royte chu Delhi-ah kalin, Pu Yogendra Tripathi, Union Secretary, Ministry of Tourism chu hmuin a zu kawm a, kan ram tana thil pawimawh tling phak thil a zu sawipui kha a ni a, ka’n rawn thual tlai khawhnu teh ang.
Aizawl Bung Bangla-a sak, Institute of Hotel Management building chu kum 10 kal ta chhung khan sak chhunzawm a ni lo tih thu te sawiin, Mizoram tan leh India ram pum huap pawha zirna in pawimawh a nih avangin sawrkar chuan a ngaipawimawh tih hrilhin, equipments leina tur Rs 200 lakh a dil a, Union Secy leh Economic Adviser te chuan Institute of Hotel Management chu ram pum tan a pawimawh avangin Rs 200 lakh chu an release thuai tur thu Mizoram Tourism Minister chu an lo hrilh a.
He institute-ah hian zirlai 100 tan Hotel Management Degree course a zir theih dawn bakah zirlai 150 tan Tourism Diploma Course a zir theih bawk dawn; hei ringawt pawh hi Mizo thalaite tan chuan thu lawmawm a tling reng mai. He institute hi National Council For Hotel Management and Catering Technology vilna hnuaia enkawl tur a ni a, Common Entrance Test hmangin Degree Course zir tur tan admission tih theih a ni dawn a ni. |halai lehkha thiam kan tam si a, kum tin mai hian graduate thar eng emaw zat kan awm reng bawk si, kan ram a zimin sawrkar hna hian min daih meuh si lo va, heng kan thalai lehkha thiam tak tak, fel tak takte tana hna zawnsak, siamsak hi sawrkar hian a ba vein ka hria. Mahni sawrkar bultan a nih loh vanga sawrkar hmasa zawkte hma lo lakna, hmasawnna kawng hrang hrang chhunzawm duh loh tlat mai te hi a hnam hnuaihnung zia lutuk a, kan sawrkar ruahmanna ni kher lo pawh, sawrkar hmasain a riruang a lo zam tawh chu tha taka thawh chhunzawm mai hi a ram hmangaih zia zawk a ni tih hi sawrkar apiang hian hre teh se.
Hei bakah hian Pu Robert Romawia Royte rawtna angin Mizoram College thlan bikah Tourism Course zir theihna tura tanpuina pek chu Tourism Ministry chuan a thuphungin an rem ti bawk a nih kha. 7.2.2023 khan Ministry of Tourism Department-in a taka function tura hma a lak mek, State Institute of Hotel Management Bungbangla-ami chu Tourism Minister Pu Robert Romawia Royte leh mi pawimawh thenkhatin a hmunah tlawhin a taka function tura Tourism Department-in hma a lak dan te an en ho a, tun hnaia Tourism Ministry-in Rs 200 lakh a sanction hmanga S.I.H.M atana bungbel leh hmanraw lei tharte an en ho bawk. Hetianga sawrkar laipui atanga tanpuina sum lo kal, a hmanna dik taka hman ni-a langah hi chuan a lawmawmin thla a muang ve thin.
S.H.I.M hi 2009 February thla atanga sak tan kha niin tender koh a ni lo va, PWD Project Division III-in departmental-in an thawk a. Thla 18 chhunga zawh fel tura tih ni mah se thla 55 hnuah, September 2013 khan zawh fel chauh a ni. S.H.I.M atan hian sawrkar laipui chuan nuai 1,000 (construction atan 800, Equipments atan 200) a sanction a, hei hi release vek tawh a ni bawk. Equipments hi tun hma khan lei a la ni lo a nih chuan kum kha leh chen equipments man tur nuai 200 kha khawiah nge? Equipments te hi an lo lei tawh a, a lo chhiat hman tawh avangin a thar leina tur Pu Robert Romawia Royte hian a zuk dil leh tihna em ni?! Zawhna a va tam ve! S.H.I.M building hi sak zawh a nih hnu, 2013 hnu lamah pawh a nihna tur anga kalpui theih lohvin a awm reng a, kum 2018-a sawrkar thar a lo pian hnuah pawh chhunzawm lohvin a awm zui zel a. Hei hi Covid vang ni-a sawi a ni.
Tourism Minister Pu Robert Romawia Royte chuan “S.I.H.M building sakna tur sum hi kum 2008 – 09 ah Rs 800 lakh sanction a ni a, hun eng emaw chen hnuah sawrkar thar a lo din leh hnu 2019-ah S.I.H.M danin a phût angin Cabinet-in S.I.H.M atan post 32 siamin a taka function nan hma a la nghal a, Covid hripui avanga harsatnain hmalakna a timuang chungin theihtawp chhuah azarah equipments ngai tur te lei thar a ni leh ta a ni,” a ti a.
“S.H.I.M hi Mizoram mamawh em em a nih avangin sum harsatna khirh tak karah pawh a taka a function tan dan tur sawrkarin a ngaihtuah mek a, tih ngai la tam viau mah se kumin chhungin eng course emaw ber chu tan kan beisei a ni,” a ti a, a thlamuanthlakin a taka an puitlin ngei, a rang lama a function thuai lo beisei ila.
Kan thalai tam tak lehkha thiam pui pui, hna thawh tur hre mai lo awm nghêk nghûkte hmakhawngai sawrkar, hlauh nei lo sawrkar, kan thalaite hma ngaitu kan mamawh a ni. Kum tin thal sang rual an graduate suau suau a, hna thawh tur nei lo M.A/B.A an inpel suau suau a, an tih theih chen lehkha zir chu an ti vek tawh, an zir theih ang chen chen an zir vek tawh, mahse hna an hmu mai thei thin lo. Heng thalai, lehkha an zirthiam hnua thawh tur nei lova tei suau suaute hi sawrkar hian mutmawh hnarmawha a neih a hun takzet ta niin ka hria; vei satliah mai a ni lo, ‘mutmawh hnarmawh’ a ngai a nih chu!
Ram hmasawn leh changkang kan tihte hi an changkanna chhan chu, thalai thluak leh tha chakna an chhawr tangkai thiam vang a ni zel. |halaite dinhmun vei phak a, thalaite chhawr tangkai thiam kan nih hunah kan changkang ve ang!