Assembly Session kal mekah Mizoram sawrkarin sum a puk tawh zat chu cheng vaibelchhe 4,345.43 a ni, tiin tarlan a ni a.
Leibat hi Mizoram mihring chhiarpui 2011 atanga chhut chuan, chawhrualin mi pakhatin Rs 39,829 zel ba ang a ni a. Chhiarpui 2021 hi official la awm lo mah se, projected chu nuai 13.3 a ni a; chumi anga chhut chuan chawhrualin mi pakhatin Rs 32,672.4 zel ba ang a ni.
-- Advertisement --
Tunhma deuh atang tawh khan leibatna hi opposition party ten ruling an sawiselna point lian tak a ni thin a. A chang chuan ‘bat tam hi changkanna a ni’ tih thawm te pawh hriat tur a awm thin a nih kha.
Hma sawn zel tum chuan leibat hi hringnun kalphung pangngai, pumpelh theih miah loh a ni. Chutih rualin, lei bat nachhan kha hmasawn phahna atana hman tangkai a nih leh si loh chuan, bat tam hrim hrim kha changkanna a ni thei lo tih a chiang a. Mahse, ram leh hnam rotling asset siamna atan a nih chuan changkanna a ni.
Leiba kan neih hian eng hi nge kan changkan phah awkna lo thleng thin tih sawi fak tur kan nei chau thin hle niin a lang a. ‘Bat tam hi changkanna a ni’ tih hi thufing tak lo ni ta pawh ni tehreng se, keini dinhmunah hi chuan, kan bat tam hle pawhin kan changkan pui viau thin si lo lai tak hi kan buaina chu ni tain a lang. Cheng chuti zat kan pukna chhan chu hei hi a ni, emaw, saw saw a ni, emaw tia asset tha kan din han kawh chat chat tur hi a lo awm a nih pawhin, kan leibat nena inmil/inphu kawh tur hi chu kan nei chau thin hle niin a lang.
Chuti ni se, eng vanga lei hi ba ta teuh teuh thin nge kan nih, tih hi zawhna hmasa chu a ni awm e. Thawh chhuah kan nei tlem a, budget ropui kan nei thei lova, chuti chung chuan mihring nuai 10 aia tam enkawlna aiin sawrkar hnathawk mi singnga vel hlawh leh sawrkar dept enkawlna sum senso hi a tam zawk daih a; budget pumpui 70% vel a ni thei a. Chuti chung chuan inrenchemna ‘austerity measure’ lamah kan kal na em em ngai lo a tih theih bawk.
Ba tam mah ila, kan changkanpui miau chuan a hlawk a ni mai a; mahse kan bat tam hi kan changkanpui lo a nih si chuan, insiamthatna tur kawng zawn chhuah a, huaisen taka chumi kawng zawh tura kan inbuatsaih chu kan hmabak a ni awm e.