Thalaiten Congress sawrkar laiahmasawnna tam tak an hre ta lo

• Lal Thanzara

Congresss sawrkar laia hmasawnna hnathawh tam tak chu tuna thangthar zawkten an hre ta lo hle a, an sawi tam a ngai tih Congress hruaitu Lal Thanzara chuan a sawi.
Thawhlehnia Lunglei-a Congress Bhavan-a inkhawmah MPCC president Lal Thanzara chuan, Pathian leh mipui zarah Congress party chuan tum engemawzat sawrkarna chang tawhin hmasawnna tam tak a lo thawk tawh a. Party dang erawh chuan sawi tur an van viau tih a sawi. Congress party-in thil tha tam tak a tih hi thalaiten an hre ta lo hle a, chutih laiin tute emaw chuan engmah tih neilo angin an lo sawi bawk nen, Congress party-in ram tana thil tha tam tak a tih chu sawi tam leh a ngai tih a sawi a ni.
Lunglei Civil Hospital-a Trauma Centre, CT scan leh thisen sawngbawlna hman mek chu Congress sawrkar lai ami vek a ni, tiin, tuna Health minister pawhin duat tak leh tha takin changtlung zawkin a enkawl zel an beisei tih Health minister hlui Lal Thanzara hian a sawi a. Hei bakah hian Lungleia engineering college, Thuamluaia Mual-a phullem phah, Lena Stadium leh Laldenga Park pawh Congress chhul chhuak vek niin, Lunglei tlangval tam takin eizawnna atana an hman auto rickshaw NLUP atanga an dawng kha an lawmpui awm hle tih a sawi bawk.
“Tuna sawrkarin India rama project awm tawh sa hmanga anmahni tih niawm taka thalaite bana kaih an han ti ve ngawt hi a zahthlak a, an insawi anga an awm loh zia erawh kan hre zel a ni,” a ti.
2028 inthlan turah mipuiin sawrkar turin an beisei hle tawh tih MPCC hruaitu hian sawiin, an beisei ang ngeia hlawhtling turin anmahni an insiamrem a ngai tih a sawi.