Thalaiten insawiselna ringawt ngaisang tawh lo – Vanlalhlana

Politics-ah thalaiten insawisel ringawt an ngaisang tawh loa, insawisel tamna hmun apiangah an chak emaw tih tur a ni tih minister Vanlalhlana chuan a sawi.
Thawhtannia ZPM inkhawmah Vanlalhlana hian ZPM sawrkar chu an party mi an lawm ang bawkin mipui an lawm a, an beiseina pawh a sang a, an beisei ang an phak loh chuan kan ram chu kal ngaihna a vang tawh dawn tih a sawi. Kan politics khelh dan a dang hret hret nia sawiin, “Thalaiten ram tana tha tur ram veina an nei lian tial tial a. Insawiselna ringawt hi an ngaisang tawh lo. Insawisel tamna hmun apiangah kan chak emaw tih turin kan awm. Sum hmatheha inthlan hma-chhawn hian awmzia a nei thui tawh lo hle tih a chiang a. Bial tin deuhthawhah kan khingpuiten sum an chelek chung khan sum vanga chak an tlem hle,” a ti.
Mipuiin an chungah rinna an nghat a, sawrkarna ngelnghet tak siam turin ZPM a ding ta a. Opposition party-te pawh thu feikibar pui puia an inbeihna titawpin, sawrkar tha leh chak tak nei tura tangho turin a sawm tih minister hian a sawi. “Opposition leader Pu Lalchhandama Ralte khan constructive opposition nih a tum thu a sawi a. Tha takin kan kalho thei ngei ang tih ka ring a ni,” a ti.
ZPM president Lalliansawta chuan ram siamthat tih an sawi thin chu an mawhah a lo tla ve ta a. ZPM party mi emaw midang tu pawh nise, ram siamtha tura thawkho zawng zawngte insang phek a, mahni tanghma haina thinlung dah bo a tul tih a sawi. “Mihring ve tho kan nih avangin heti lam hi sawi a tul ve tho. Keimahni tan leh kan chhungkaw tan tih ringawt hi ram siamthat nan a tawk lo,” a ti.