Aizawl Sipai Lammuala nihnih awh Pawl Kut hman chu Inrinni khan a khar a ni a. A khartu chief minister chuan Pawl Kut lawm leh hman chu chhunzawm zel a tha a tih thu sawiin, thil phochhuah leh tih lan kaltlangin Pawl Kut pawimawhna tam tak naupang leh thangtharten an hriat a beisei tih a sawi.
-- Advertisement --
Mizo thawnthua kan hriatlarte chanchin lemchana entir chu thil hlu tak a ni, tiin, “Naupang tam takin Mizo culture-a thawnthute an hmelhriatin heng thawnthu hian zirtir ropui leh tha tak tak an neihte an hre lehzel a, chu chu naupang tan a hlawk lehzual. Hmanlaia Mizote chanchin leh an nun dana zir tur tam tak a awm a, hengte hi thangtharte kan zirtir leh hrilh a pawimawh a, chutianga tan chuan Pawl Kut hi hman tangkai a tha a ni,” a ti.
Art & Culture minister R Lalzirliana chuan piputen naupang puala Kut an neih kha naupang an ngaihpawimawh leh ngaihhlut zia a tilang a ni, tiin, hnam nunphung leh ziarang inzirtir chu thil pawimawh tak a ni tih a sawi.
“Changkanna leh hmasawnna hrang hrang avangin naupang leh thangtharten kan hnam chin dan tha, hnam ziarang leh kan culture hi an hrechang thei loang tih a hlauhawm a, chuvangin hetiang hun kan buatsaih leh hmang hi thil tul tak a ni, Hmasang piputen huaisenna leh tlawmngaihna nena naupang an chher dan kha a duhawm hle a; Zonun zemawi lantir leh chhawmnun zel hi hnam damna ni ah ka ngai,” a ti.
Pawl Kut 2023 ah hian sikul hrang hrang naupangten hnam lam, a huhoa Cheraw kan leh Mizo thawnthu lemchan an entir a. Mizo thawnthu lemchanah hian Mauruangi, Chhurbura, Mualzavata, Chawngchilhi, Chawngtinleri, Pawngvina, Lalruanga leh Keichala te bakah thawnthu lar dangte entir a ni. Heng bakah hian lalnu Ropuiliana, lal Bengkhuaia te chanchin lemchana pholan a ni a. Mizo infiamna leh Chheih lam intihsiak a ni bawk.
Mizo infiamna chi hrang hrang 12-ah sikul naupangte tan inelna siam niin, middle school section-ah Govt. Chanmari M/S, high school section-ah Govt. Chaltlang H/S te chu overall champion an ni. Chheih lam intihsiakah middle school section ah 1-na Govt. Chhinga Veng M/S; 2-na Govt. Venghlui M/S leh 3-na Govt. Chanmari M/S an ni a. High school section-ah 1-na Govt. Mizo H/S; 2-na Govt. Chaltlang H/S leh 3-na Calvary H/S TNT an ni.
Lammualah hian January 20 atang khan Pawl Kut hi hman tan niin, naupangte Mizo infiamna hrang hrang an hmelhriat nan pholan a nih bakah ntihhlimna leh infiamna chi hrang hrang chhawpchhuah a ni. Kut hi Social Welfare & Tribal Affairs Department-in sawrkar laipui Ministry of Tribal Affairs bultuma a buatsaih a ni.