Thangtharten Mizo history an hriat lehzualnan textbook ruahman

Thangtharten Mizo hnam ziarang leh history an lo hmelhriat zawk theihna’n school textbook siamrem a ni tih School Education minister Lalchhandama Ralte chuan a sawi.
Samagra Shiksha 2020- 2021 fund cheng nuai 327.432 senga sak DIET Lunglei academic building thar Thawhlehnia a hawnnaah School Education minister chuan, Mizoramah zirna in hma a sawn zel theihna’n department-in nasa takin tan a la tih a sawi a. National Education Policy 2020-in a duan angin school-a zirna chu a bulthut atanga siamthat hna thawh a ni, tiin, SCERT hmalaknain elementary education tih hmasawnna turin Early Childhood Care and Education lamah theihtawp chhuah a nih bakah textbook leh syllabus pawh siamthat mek a ni tih a sawi.
“Zirlai thangtharten Mizo hnam ziarang leh kan history te tun aia an lo hmelhriat zawk theihna’n school textbook pawh siamrem chhoh mek zel a ni,” tiin, govt adhoc aided school te upgradation tur chungchangah chu department-in hma a lak mek tih a sawi bawk.
Zirna siamthat tum chuan zirtirtute training-na hmunpui DIET-ah bul tan a tul a ni, tiin, DIET Lunglei academic building thar chuan an hnathawhna leh an zirnaah nghawng tha tak a neih ngei a beisei tih Lalchhandama Ralte hian a sawi a ni.
DIET Lunglei academic building sak hna hi Allied Concern-in a thawk a. 2022 February 23 khan thawk tanin, kumin June 22 khan zawh a ni a, chawng hnih a ni.