Thawhpuite ngaichang chungin office-a hna thawh chin hria ang – Chief minister

Thawhpui leh an hnuai amite hrerengin, a tul bak bak office-a awm khawtlai fo loa, kal hun dika thlen a, a huna haw mai thin turin chief minister-in sawrkar hnathawkte a chah.
Administrative Training Institute-a foundation training nei mek Mizoram Secretariat Service officer-te chu chief minister Lalduhoma hian Nilaini khan a kawm a. Sawrkar file kalpuinaa note siamtu pawimawh ber zing ami an ni a, sawrkar dan leh a amendment an hriatchian hle khan thutlukna siam kawngah an tangkaipui thin tih a sawi a. Service association a kawmte hnena a sawi zel chu, service inkara inerna awm thin chu tha an ti loa, sawrkar pakhat hnuaia thawk vek an ni a, ram tana thawkho vek an ni a. Sawrkarin tul a tih angin hnathawktute chu a siksawi thei tur a ni, tih a sawi.
“Hun vawn dik hi a tha a, kan thawhpui leh kan hnuai amite hrerengin, a tul bak bak office-ah kan awm khawtlai fo tur a ni lo. Hna tam tak hi chu office hunbi pangngaia thawh theih an ni a, tlai taka kal a, tlai taka bang loin, a hun taka thlen a, a huna haw mai tur a ni,” a ti.
Hmathlir fel tak neiin an kal tih Lalduhoma hian a sawi a. Flagship scheme an nei a, heng an flagship hi an ngaipawimawh a, sawrkar hnathawkte pawhin lo ngaipawimawh se a duh tih a sawi.
Khawvel a inthlak chak em em a, thil thar tha zawk ngaihtuah chhuak thiam officer an mamawh tih sawiin, “Mahni chhungkua theuh vil tha ila, chhungkaw tha din ang u. Chu chu khawtlang leh ram tan thil tangkai tak a ni,” a ti.
Trainee-te hian chief minister hi an duh apiang an zawt a. ATI director Rita Lalnunmawii Pachuau leh a thawhpuiten an hruai a ni.