Thawk satliah…

DIET Aizawl-in kum 70 a tlin lawmna hmanpuitu education secretary chuan, hna dang hmuh loh avanga zirtirtu hna thawk ve ringawt, hlawh lakna tur chauha a run dala thawk satliah an awm a nih chuan, chu’ng zirtirtute chu kan ram leh hnam hmelma an ni, tiin tunhnai khan a sawi a.
Education department hnuaiah chauh pawh ni lovin, department hrang hrang hnuaia thawktute zingah pawh hian ‘thawk satliah’ an awm a nih chuan, anni pawh ram leh hnam hmelma dik tak an ni dawn tihna a ni awm e.
Zirna kan uar ang hu hian ‘zirna tha’ (quality education) lam hi chu kan enghelh leh tehchiam chuang lo niin a ngaih theih a; hei hi a chhan pawh, aikal zirtirtu an awm theih tlat dan atang hian a lang chiang mai awm e.
Aikal chungchangah hian ‘aikal latu’ zirtirtute hian dem an hlawh duh phian mai a, an demawm a nih pawhin, aikal laktir theitu, chung lama thuneitute pawh an demawm nghal tih hi kan hriat tel a pawimawh awm e. DIET atanga training chhuak zirtirtute hian training ve miah lo, training chu sawi loh, teaching lama experience pawh la nei miah lo, qualification-in a phak e tih vanga an aiawha zirtirna hna thawk tura mi an rawih chhawn leh hian, thuneitute phalna thlap a nih chuan, phalna petute chung chu a pik zawk tura chu niawm tak a ni. Chumi awmzia chu, engineer hna thawk tura engineer ni ve lem lo, a zawlpui graduation eng emaw a neih vanga rawih ve ringawt nen a inang reng awm e.
Aikal lak ni lem loah pawh, thahnemngaihna nei lova hlawh ringawt duh vanga thawh ve mai mai hi a awm theih bawk ang a. Hetah pawh hian institution head-te an pawimawh dan chu kan hre tlang vek awm e.
Kan ramin hma a sawn chak theih lohna chhan lian ber hi han chhut vang vang hian, ‘thawk satliah’ kan lo tam vang hi a ni thei dawnin a lang.
Thil tha leh dik kan duh chuan, a root lam a pawimawh. Thing/thlai kan phun pawhin a leiseh chin hnuai lam kan duat hmasa zel a nih hi, a zung awmna lamah leitha leh tui kan pek uluk chuan thlai a thang tha mai. Chutiang chiah chuan hna hrang hrang pawh hi hotute lam atanga chian hmasak a pawimawh a, ‘thawk satliah’ hotu chuan satliah dang a hring zelin a rinawm.