THAWKDUN TURIN MNF NEN INBIA NDA an chhuahsan loa, inbiakna a tawp – Lal Thanzara

Lok Sabha inthlanpui neih turah MNF leh Congress party chu thawhdun tumin an inbia a, MNF hi BJP kaihhruai National Democratic Alliance atanga an inhnuhdawh theih loh avangin an thawk dun thei ta lo niin Congress president Lal Thanzara chuan a sawi.Ningania an party MP candidate tur puannaah MPCC president chuan, MP inthlana thawk dun tur hian MNF party-in an rawn dawr a, MNF lam rawtna angin inhmuhna tura thlan Congress Bhavan bul hotel-ah an inbia a, senior vice president Dr R Lalthangliana hoin an lokal a, an ni hi vice president Lalnunmawia Chuaungo hoin an kal a, thawhho tha an ti a, amaherawh chu NDA leh NEDA lama inzawmna in inhnuhdawh loh chuan, Congress-in a beih tur chu BJP a ni dawn tih an hrilh hnu ah inbiakna a kaltluang ta lo tih a sawi.
“BJP chu sakhaw zalenna nuaibo duhtu an ni a, keini’n sakhaw zalenna kan duh a, hei hi in chhutchah loh chuan a va rem teuh awm lo ve, kan ti a. An inzawmna an chhu chat dawn ta lo aniang, kan thawkho dawn ta lo a ni,” Lal Thanzara hian a ti.
A hnuah MNF hruaituten an rawn be thin a, mah se, thawkho ta se, Parliament-ah khawi lam zawkah nge an MP chu a thut ang, tih an lo zawt tih MPCC hruaitu hian sawini, “Tlin huna la ngaihtuah atan an dah a, issue base-a kalpui an duh thu te an sawi a, issue base chuan an Lok Sabha MP pawh a kal ngam loh zia kan hre tawh a, chuvangin NDA leh NEDA atanga an inhnuhdawh loh chuan MNF hi thawhpui ngam chi ah kan ngai loa, keimahni in kan kal ta a ni,” a ti.
Congress political agenda ber chu, MLA inthlanpuiah pawh an auhla ber, kan ram kan hnam kan sakhua a himna atan, tih chu tunah pawh an auhla ber tur a ni tih a sawi.
Zawhna chhangin, tlin ngei an inrin avanga hetianga hma la hi an ni a. MP inthlan chu MLA inthlan nen chuan sawizawm vak chi ah an ngai lo tih a sawi. “Tuna sawrkar lai hi neutral leh enchhin duhtute vote tlin an ni a. MP ah chuan Congress a tlin a, a sawrkar ngai tih ngaihdan neia min hrilhtu an tam. BJP-in sakhaw zalenna nuai chimih an tumna do duhtu chu Congress party chiah a ni a, chuvangin min vote kan ring,” a ti.