Thawktu la neih loh vangin LMC a mumal lo
Lunglei Municipal Council-ah state sawrkarin thawktu a la pek loh avangin hna an la thawk mumal thei lo tih sawi a ni.
Lunglei Municipal Council hotu, chairman Lalzuithanga hoin vice chairman K Lalrinawma leh executive councillor Zorinsanga te chuan Thawhlehni khan Lungleia thuthar thehdarhtute an kawm a. LMC din a nih atanga sum an hmuh tawh zawng zawng chu Rs. 156,57, 126 a ni a, councillor-te lawmman atan Rs. 12,08, 821 hman tawh niin, office expenditure-ah Rs. 14,20, 893 hman a ni tawh.
State sawrkar hnena thawktu tur an dilna a hlawhtlinna hmuh tur a la awm loh avangin a taka hnathawh a la harsa niin an sawi a. LMC bul tanpuitu leh thil chinchang hre ber chief executive officer sawn a nih avang leh secretary chu Revenue department enkawl tel tir a nih avangin harsatna an tawh nasat phah tih an sawi. Tunhnaiah sawrkarin CEO thar a pe a, FAO post an dilna pawh district treasury officer hna chelh mektu kawp tir a ni tih an sawi bawk.
Awmze nei taka hma la tur leh hna thawk tak tak tur chuan thawktu an mamawh ang state sawrkara an thlen chu UD&PA-in Finance lamah an thehlut tawh tih an sawi a. Engemawzat tal a hlawhtlinna an hmuh hma chuan hma lak a harsa hle dawn tih sawiin sawrkar pawhin an mamawhna hria in, thawktu pek belh thuai se an duh tih an sawi a ni.
Draft Lunglei Municipal Council Regulation/ by Laws paruk chu peih a ni tawh a, September 13-a Board of Councillor thutkhawmah pawm a ni anga, cabinet pawmpui turin thehluh tum a ni tih an sawi a ni.
LMC hmalakna :
# LMC Complex tur zawn mek a ni a, hemi atana sum mamawh hi UD&PA in ngaihtuah sak an tum a ni.
# Truck terminal siam turin NHIDCL nen indawr mek a ni.
# Lunglei Municipal Council hnuaia ward 11-ah kumin June khan Ward Committee din fel vek tawh a ni a, Ward Committee member atan political party tin aiawh leh a dah awma ngaihte an dah.
# Lunglei khawpui dai hmun thumah Solid Waste Management Centre siam tumin hmun hrang hrang an en tawh a, Lunglei hmarlam Pukpui daiah LMC chairman-in ama ram a pe tawh a ni.
# Sanitation leh advertisement and hoarding chu a enkawl mektu department atangin LMC kutah dah a ni tep a. Kumthar lam atangin Property Tax lak theih an inbeisei.
# Tuna Lungleia lirthei parking fee khawn dan fel tawk lo leh parking atanga sum lut hmanna Lunglei mipuiin an hre lo reng chu thil fello tak nia hria in, LMC-in parking fee khawn thei turin hma an lak mek a; kumin October atang chuan LMC kaltlangin Lunglei khawpui parking fee felfai zawk leh awmze nei zawka khawn theih an inbeisei.