The Interview

R.Lalfakawma Seling

Internet leh social media-in min luh chilh hnu hian interview kan uarin kan ching chho ve ta hle mai a. Ngaithlatu tan bengvarna leh nun hruaitu pawimawh tak a nih theih rualin interview-tu tan pawh mipui tibengvartu an nih piah lamah mi lâr zawkte hmanga intihlarna tha tak a ni ve rêng rêng bawk. Amaherawhchu, kan ramah chuan interview-tute hian an mi kawmte nun lairil an luh chhuah viau loh avângin a tuamna kâwr mawi chin hi kan hmuh theih a ni tlangpui.
MLA Candidate tur zinga pakhat, mipui tam zawkin Chief Minister atan pawh kan darling rawn ni awma social media-a kan hmuh chuan Sudden Muanga bute pawh a lehlin ve thin thu a sawi kha a darh zâu phian mai a. Ani a sawitu lah khan “Sudden-a bu ka tihna” a ti mai bawk si lo va, a kawmtu lahin “Ka pu, Sudden-a bu a ni zawk em?” han ti mai bik hek lo. |henkhatin a thil sawi sual tê tham tak kha thiam takin thil dang an kaihhnawihtir a, a awm ang viau tho zel si a. Interview hi fimkhur a ngaih hmel khawp mai.
Hmân deuh khan Speaker lar êm êm pakhatin, “Ka pawm nawlh” a tih te, a tûr in thin chungchangte kha interview kal tlangin kan hmu bawk a, a hlimawm phian mai. Christopher Silvester-an interview chungchang a ziahna thenkhat lehlin pahin Zoram khawvêla interview chungchang nen i chawm pawlh law law teh ang.
Interview hi kum 130 kal ta vela chin tan a nih atang khan interview hian Journalism khawvêlah chuan hmun lailum a luah reng a. Tûnlai khawvêlah chuan lehkha chhiar thiam tawh phawt chuan tu emaw an interview-na hi tum khat na reng reng chu kan chhiar vek tawh awm e. Mi lar sang tam takin interview an hmachhawn tawh a, a lar zual thenkhat phei chu an kawm mawlh mawlh a ni ber. Interview-in nghawng a neih dan te, a kalhmang leh tangkaina chungchangah te ngaihdan hrang a tam hle a. |henkhat lahin a lova luatin an fak emaw tih tur a nia – thu dik laih lanna pawimawh tak a nih bakah a kalhmang hrim hrim pawh hi themthiamna ril tak hman ngai a ni an ti.
Hmânlaiin hnam thenkhat chuan thlalak (photography) chungchangah hian rin dan mak tak mai an nei a. An rin danah chuan mi pakhatin mi thla a va lak hian a thla laksak pa thlarau chu thlalatu chuan a laksak telah an ngai thin. Hetiang deuh hian mi lar thenkhat chuan interview-tute hian an larna leh hmingthatna te tihhmelhemsak niin an inngai a; an chunga harsatna thlentu, an tana hnawksak, an duh lohna thleng thlenga hnuktu nite pawhin an ngai bawk.
‘Alice in Wonderland’ ziaktu Lewis Carroll phei chuan interview-tute hi a tihin a tih a, an biangbiak nih a duh ngai lo – Mi dangte aia pawimawh bik ni awm taka cheibawl kual vel a duh lo va, chuvangin a hmelhriat thenkhat te, interview-tute leh autograph diltute a pehhel fo. Rudyard Kipling-a tak hian interview a duh loh thu a au rinpui a, “Mi zahawm pangngai chuan interview an duh lo ang, tlema hnuaihnung deuh tih mi a ni” a ti. Lâr lem lo, lâr duh ve si tan chuan man chawi deuha tihte pawh thil awm thei a ni ang chu!
Kum 1894-a H.G.Wells an interview-naah chuan, “…infiahna hrehawm tak a ni” a ti chungin tum tam tak interview a hmachhawn tho a. Saul Bellow, interview pawi sa lova vawi tam hmachhawntu chuan tum khat chu, “Interview chu kut zungpuia thawkna dawt hmeh pin ang deuha hrehawm a ni” a ti ve tho nia.
Hetianga hnualsuatna a tam rual rual hian chanchin inhriatpawhna tura hmanraw pawimawh leh remchang ber a ni thung. Hun dang zawng zawng aiin tûnlai khawvêlah chuan interview hian hmun a luah thuk a, ngaihdan hrang hrang inhriatpawhna hmanraw pawimawh tak a ni. Denis Brian-a chuan, “Thil engkim tih theih deuhthaw hi in-biangbiakna kal tlangin kan hria a. Hei vang hian interview-tu chuan thiltihtheihna danglam bik leh mi hneh theihna mak tak a nei a ni” a ti.
Zoram khawvêlah pawh Interview kan hmu tam ta hle mai. Tûn dinhmunah chuan a kawmtu leh a kawma tan intih-larna satliah anga ngaih theih mai tur chi pawh a awm. A chhan pawh interview-tute hian an nun ril phawrh chhuah tumna nei hran lovin a mawi lai, a chhuanawm lai chauh hai chhuah an duh tawk vang a ni. Chuvangin hnar phal chu sawi loh a sawma sawm pawh kan awm hial mai thei a ni
Tûn hnai Manipur boruakah TV anchor fing tak tak ten interview an tum ngial pawha hnial tlat, TV lama lang duh hauh lo politician leh mi pawimawh tak tak an awm; National Commission for Women Rekha Sharma phei chu a inlan that duh loh avangin journalist thenkhat chuan an dim lo hle a. An thil tih dik loh ni a lang emaw, an ngaihdan emaw sawi chhuak turin kar viau mah se an sawi tha duh hlek lo. Tin, Manipur Chief Minister N.Biren Singh pawhin amah kawmtu hnenah a duh tê chin bak a sawi duh lo va, a kawmtuin zawh tum teh mah se a hnar lui tlat mai a nih kha.
A hma lama kan sawi tak ang khan interview hi chanchin kan inhriat tawnna ngaihnawm leh langsar, hmuhnawm bawk si a ni a. MLA inthlan kan hmachhawn hnaih leh takah chuan TV leh social media lamah kan politician-te kawmna pawh kan hmu tam chho zel ang a. Interview-tute hian ram hnuk leh hmasawnna tur ngaihtuah pha chungin kan politician-te pawh hi kawm nachang hria se, mipui tan a bengvarthlak zual ang a, ramin kan hlawkpui lehzual ang chu. A nih lohva politician ten an manifesto sawi mawina leh inzawrhna lam hawi ngawt a nih chuan party dang tan a ngaihnawm lo va, neutral tan a hlutna a nêp ang. Tling ta se eng nge an tih tur? Eng nge an tih loh tur tihte hi chik zawka zawh chhuah thiam a pawimawh hle a ni.
Tûnlai hian sawi anga awm leh si loh, tih leh si loh hi kan politician-te hian an hreh lo riau niin a lang a; hreh lo mai pawh ni lovin an inthlahrun phah chuang lo ni te pawhin a lang. Tu party mah hi he lamah chuan an fihlim lo ni awm tak a ni a. Assembly house lamah han insawi dawn se Zawlbûka e tâng theuh theuh; mahni ngum khak hmu lo va mi dang ngum khak hmu chan an chang dawn a, an insawi lang ngam lo law lawte pawh a ni ang e.
Inthlan a hnai tial tial a, party hrang hrang ten an tlin huna thil tha tih tur sawiin an rawn inzuar leh dawn. Sawi loh anga awm; tiam anga tih leh si loh; manifesto puitlin leh si loh angte hian mipui min tibeidawng a, a tiamtute pawh an insuih tê mai mai a ni tihte hi interview-tute hian politician an kawmte kiangah hian sawi ngam se, sawi anga awm te pawh an tum phah deuh awm asin le.