Thenawm state-te an harh – Congress president
India hmarchhaka state zingah tun MP inthlanah BJP leh a thurualpuite paihthla in Congress MP an thlangtling fur a, Mizo mipui pawhin ngaihtuahna kan sen a, kohhranin nasa zawka hma lak a tul nia a hriat thu Congress president Lal Thanzara chuan a sawi.
Zirtawpnia Congress Bhavan-a inkhawmah Lal Thanzara chuan tun MP inthlanah an beisei ang hmu lo mah se, Congress-in lawmna tur tamtak an nei a ni. An uuhla – kan ram, kan hnam, kan sakhua himna, tih chu party dang, BJP thawhpuituten aupui ve mah se, ram leh hnam, sakhua himna tiderthawngtu BJP thawhpuitu an ni, tiin a sawi.
Nagaland ah Congress-in MLA nei tawh ngai lo mah se, MP-ah chuan Congress MP an thlangtling tlat tih sawiin, “Hemi chungchangah hian Pu Lalthara IAS (Rtd) ka han bia a, a ni chuan, Naga mipuiin central politic-ah awareness an nei tha a ni ang, tiin min lo chhang. Kan thenawm Meghalaya-ah pawh Congress MP an thlangtling a, Manipur-ah MP pahnih chu Congress-in an la ve ve a ni,” a ti
Mizo mipui pawhin ngaihtuahna kan sen a ngai nia a hriat thu leh kohhranin nasa zawka hma an lak a tula a hriat thu a sawi.
Central-ah INDIA Alliance-a an thawpuite nen result tha tak an nei a, sawrkar pha lo mah se, an chak lohna a tlem hle a, an hmabak a eng hle tih MPCC president hian a sawi. “India ramah Congress an ral tawh, tih te thenkhatin an sawi thin. Central-ah chuan Congress a tho leh mek a ni tih tun inthlanah khan kan hmu a. Tun tumah chak zo lo mah ila, inthlan lehah Lok Sabha-ah Congress kan chak leh ngei dawn tih a chiang hle a ni,” a ti.
Congress MP candidate Lalbiakzama chuan MP inthlana an auhla kha auhla dik ni mah se, Mizo mipuiin kan la ngaihtuah chiang tawk lo nia a hriat thu a sawi. “A taka kan intawnharh hunah chauh em ni kan harh dawn. Party angin em ni mipui hian vote kan thlak zel dawn tih hi kan ngaihtuah a ngai a ni,” a ti. Congress party chungah leh inthlan campaign laia nasa taka tan la tute chungah a lawm tih a sawi a. Ram leh hnam tan chuan naktukah pawh MP thlan leh tur nise, a ding zel dawn tih a sawi a ni.