Thenawmte buaina in buhfai man a nghawng – Supply minister

Manipur leh Myanmar tualchhung buaina avanga Mizoram bel mektute nena buhfai mamawhna sang chuan tunhnaiah buhfai man a nghawng nia an hriat thu Food Civil Supplies & Consumers Affairs minister B Lalchhanzova chuan a sawi.
Inrinni zinga Govt Muanna Godown Complex leh Sairanga FCS&CA kudam tur sak mek a tlawhnaah FCS&CA minister chuan he thu hi a sawi a. Buhfai supply chungchangah department thawktuten theihtawp an chhuah chuan rah tha tak a chhuah ngei a rin thu sawiin, ‘Bharat Rice’ lakluh dan dap mek a ni tih a sawi.
Muanna kudama thawktute kawmin an hnathawh dan leh an harsatna neih a ngaithla a. Thawktute chuan kudama buhfai lakluh, dahkhawl leh phurhchhuah dan an lo hrilhfiah a. Weighbridge hman mek hun engemaw chen hman theih loha awm tawh pawh chu enfela siamthat a ni tawh tih an sawi a ni.
Kudam thawmthat ngai lai awm chu ngaihpawimawh hmasaka nei turin department hotute chu minister hian a chah a ni.
8 Muanna kudam-ah hian a vaiin buhfai bag metric ton 1750 a leng.
8 Khawpui thangzelah bungraw phurh luh leh phurh chhuah chungchang leh sum senso lamah a hloh a tlem zawk dawn avangin kudam hi Sairang Dinthara sawn tum a ni.
8 Muanna kudam chu chhuahsan a nih hunah pawh sawrkarin kudam complex ram hi uluk takin a humhalh chhunzawm dawn tih FCS&CA minister hian a sawi a. Ram leh mipui mamawha hman tangkai tur thil atan sawrkarin hman a tum tih a sawi.
8 Sairangah hian kudam hi pathum sak tum niin, a lian ber metric ton 1500 leng chu SASCI sum vaibelchhe 8.30 sengsa sak tur a ni a, 3036 March 28-a sak zawh beisei a ni. Metric ton 1000 ve ve lenna kudam pahnih chu NABARD hnuaiah vaibelchhe 4.4 senga sak tum niin 2025 March 31-a sak zawh beisei a ni.