Thenzawl a Zofate Pathian Biak Inpui tur chungchang sawifiah

Zoram Thar Zofate Lairelna Inpui hruaitute chuan nimin khan Thenzawl Kohhran pawl hrang hrang, NGO leh VC te ko khawmin Thenzawl a Zofate Pathian Biak Inpui tur chungchang sawifiah na hun an hmang.
He hunah hian Biak Inpui sak hnam hnatlang hawnna hun hman nghal niin, Zaichhawna Hlawndo chuan Zofate Pathian Biak Inpui Thenzawl a sak a nih tur thu chu Pathian hnen atangin ni tam takin a lo dawn tawh thu a sawi a. Kum 2015 ah chiang taka a dawn thu sawiin, Zofate Pathian Biak Inpui sak dan tur hriattirna a dawn thu leh a sakna tur hmun te mitthla a a lo hmuh lawk thute a sawi bawk.
Thenzawl chu Zofate khawpui tur a nih thu leh khawpui din dan tur te pawh a dawn thu a sawi a. Thenzawl Kohhran, khawtlang leh NGO te an tanrual a pawimawh hle dawn tih sawiin, hnatlang bul tanna tur cheng nuai 10 vel mamawh a nih thu a sawi a. Hnam Hnatlang thawhlawm lakkhawm mek a nih thu sawiin, neih daih thuai an beisei bakah a khaw neitu Thenzawl in tinah thawhlawm khawn hmasak ber a nih tur thu leh khaw mipuite rilru in hawng taka in puahchah tura a ngen thu a sawi a.
Zofate Pathian Biak Inpui hi pawl emaw Kohhran bil ta tur a ni lova, Hnam Biakin, Zofate zawng zawng ta tur, hnamah leh Krista a kan insuihkhawmna tur a ni dawn a. Khawvel hnam tinte hnena Chanchintha hrilna hmunpui Global Mission Centre a ni dawn a ti bawk.