Mizoram sawrkar hnuaia National Ayush Mission, Directorate of AYUSH buatsaihin Thawhlehni khan Thenzawlah International Day of Yoga -2024 atana inbuatsaihna, ‘100 days countdown’ hman a ni.
Kaihruaitu National Ayush Mission state programme officer Dr Sherley Lalbiakzuali chuan International Day of Yoga hmang tura sawrkar laipui inpuahchah dan leh Yoga chungchanga hriat tur pawimawh a sawi a. Yoga chu hlauh inzirtir loa, rilru leh taksa hriselna atana a tangkaina leh a thatna hriat a pawimawh tih a sawi.
Hemi zawh hian Yoga instructor-te kaihhruaiin kalkhawmten Yoga exercise an ti a. Thenzawl khawchhunga zirna ina zirlai leh zirtirtute bakah Integrated Ayush Hospital staff leh Thenzawla journalist-te an tel.
International Day of Yoga hi kum 2015 atanga hman tan niin, kumtin June 21-ah khawvel pumah hman thin a ni. Kumtin thupui thlurbing a nei a, kumin atan “Yoga for Women Empowerment” tih hman a ni.
100 days countdown hi kumin March 13 khan New Delhi-ah khuhhawn a ni a, India ram khawpui 100 thlanchhuahah ni 100 chhungin hman tura duan a ni. Mizoram chu a ni 77-na chang tura ruat a nih angin, National AYUSH Mission, Directorate of AYUSH hmalak na in Thenzawlah hian hman a ni ta a ni.
Thenzawlah Yoga Day pualin hmang
Get real time updates directly on you device, subscribe now.
Prev Post