Thiamna tlo hmanga loneitute tharchhuah tih pun dan sawiho

Thiamna tlo hmanga loneitute
tharchhuah tih pun dan sawiho
ICAR Research Complex for NEH Region, Mizoram Centre Kolasib chuan December 11&12 hian Tribal Sub Plan hnuaia ‘Krishi Mela cum State Farmers Workshop’ a buatsaih a, Ningani khan chief minister Lalduhoma’n a hawng.
“Tlangram lo neih dan thiamna tlo hmanga Mizoram loneitute tihchak” tih thupui hmanga workshop-ah hian chief minister chuan, Mizoramah hun rei tak chhung lo neih dan phung pangngai (jhum cultivation) kan lo hman tawh piahlamah, tlo zawk leh science thiamna hmanga lo neih – sustainable, science-based farming kalpui a tul tih a sawi.
“Lo neih (jhum) chu Mizo hnam nunah thuk takin bet mah se, leilung chereu zel leh sik leh sa inthlak danglam avangin leh kan hmakhua a ngelngheh zawkna atan technology changkang zawk hman a tul tawh a ni,” a ti.
ICAR Mizoram Centre nen tha taka an thawk dun chu lawmawm a tih thu chief minister hian sawiin, “An ni hian kan ram leilung mil technology leh thlai chi tha zawk, Siata Mimpui (buh) leh Mizo Popcorn-1 an chhawpchhuak a. Ran chi (indigenous livestock) leh kan state sangha, Nghavang humhalh kawngah hma lak ho a ni,” a ti.
ICAR Research Complex for NEH Region director Dr S Hazarika chuan ICAR Mizoram Centre-in technology thar tam tak, a bikin thlai chi hrang hrang, hmunhma mila ran vulh leh thlai chin kawp (integrated farming systems), leilung humhalh chunga kuthnathawh dan, tui khawlna hmun tenau zawk tihlar a chherchhuak tih a sawi a ni.
Kolasib, Mamit leh Hailakandi district atangin loneitu 300 chuang an tel a. District chhunga loneitu hlawhtlingte hnenah hmanraw pawimawh – lei lehna khawl, kea rah aieng zai sawmna, hmarcha leh thil ro rawt sawmna, pa chi khawrna leh sawngbawlna, ar note leh vawk note sem a ni a, innovative farmers hnenah chawimawina hlan a ni.
Workshop chhung hian line department ho, FPO leh loneitu hlawhtlingten an thil thar chhuah pholangin stall 25 an hawng bawk.