Thian thaah i chhuah zel em ni?

Vawi tam tak inawm dun, in inkawm, thil tam tak in ti dun tawh, tum tam tak in nui dawn tawh. A bula i awm chuan i hlim thin. Mahse, thian thaah bawk i chhuah leh zel thin em ni?
Chutiang khawpa in innel tawh hnuah chuan i duhzia thu te kha han hrilh theih hlauh la chuan boruak a danglam mai tur. Chuti a nih loh chuan nakin lawkah tu emaw a duh thu a sawi ang a, i tih pui emaw a ngai leh ang a! I ngaihzawng ni thei tur kha thian thaah bawk i chhuah leh ta tihna a ni ang.
Huaisenna i tlachham thin em ni. Tu emaw, i duh zawng tak i hmu a, mahse, i phu loh niin i ngai! A hmelthaa, a zei a, an hausa bawk, engtin nge a duh ve theih teh lul ang che, tih rilru i pu sa nghal ngawt a nih chuan a fuh lovang. I rilru puthmang i hrilh loh ten engtin nge i laka a rilru puthmang i hriat theih tak ang le!
Kan duhin kan ngaina a ni tih tlang taka hrilh mai hian a chiang ber. Mahni inrintawkna nei vak lo chunga eng signal ‘nal emaw i hman ve khan a chiang lo thei tlat. Tu emaw i duh a nih chuan i duh tih a hre tur a ni a, i hrilh si loh chuan engtin nge hria se i tih? I hrilh ngam si lo a nih chuan a tawpa thianthaa chhuah leh chiah i hmabak.
Hun tha pawh bawhpelh theih tak a ni. I chetziain a hriatthiam theih turin i ti lang a, mahse, chetzia ringawt i hman rei lutuk chuan midang tawngkam thlum zawk lakah a kalsan leh mai ang che tih a hlauhawm. Inngaihzawn tan nana hun tha hi a awm ve a, chu chu belhpelh theih niin relationship lama mithiam ten an sawi.
I rilru ang a lo pu ve ta lo a nih pawhin zah vanga kimki chawih chawih tur i ni chuang lo. I duh deuh khan a lo duh ve ngei ngei dawn che tihna a ni kher lo. Chutiang boruak chu i tawng ta a nih pawhin midang zawn leh mai tur a ni. Beidawn nghal ngawt tur a ni lo.
Ngaihdan leh pawmdan inang lo tak hi a awm ve theih a. I duh deuh khan a lo duh ve tho che a, mahse, in han inkawm chiang a, in lo inmil mang hauh lo a nih pawhin chutiang mite nen chuan inthian that a awl leh hle thung. Entir nan, nang inren ker ker chi i nih laia ani hmang deuh pawp pawp chi a lo nih si chuan, in inkarah harsatna a awm thei ang. Mahse, thian tha tak erawh i ni thei tho si ang. Chutah, mi hi kan ngaih ang ngawt an ni lo ve thei a, han inkawm chian a, kan rin ang ni ta lo te pawh an awm thei.
I duh zawng te kha i ngaihzawng an ni vek thei kher lo tih hre reng la, thian thaa chhuah tawk i neih pawhin lawm tho rawh.