Thil kan intiam zung zung a, a tak ram kan thleng zo si lo – Rosiamngheta

Thil kan intiam zung zung a,
a tak ram kan thleng zo si lo
– Rosiamngheta
Hotuten thil kan tiam zung zung a, a tak ram kan thleng zo leh thin si lo tih Congress hruaitu Rosiamngheta chuan a sawi.
Thawhtannia Congress Bhavan-a inkhawmah Aizawl Municipal corporator Rosiamngheta chuan, ‘smart city’ aiin ‘smart MLA’ kan mamawh, a reltute kan smart chu he ram hmasawnna atan a pawimawh tih a sawi.
“Thil kan tiam zung zung a, changkang takin thil kan sawi a, a tak ram kan thleng zo leh si lo. Kan system hi ennawn a ngai a, mimala hlawkna tur kan um lutuk a, ram hian mimal dinhmun that falna aiin kan khawtlang that tlanna a mamawh zawk,” a ti.
Health care chu pay scale leh deposit azira package hrang hi a dik ber em tih ngaituah a ngai tih a sawi a. Pay band-in awmzia a neih a, kan sum azira kan duh package lei theih a tha zawk em, tia sawiin, “Group ‘A’ officer leh peon natna vei hi a senso a inang thei, chuvangin ngaituahna uluk taka hman a tul. Kan sawrkar sum hi vantlang chhanchhuahna atan kan hmang tur a ni,” Rosiamngheta hian a ti
He ramah hian retheite pawh nuamsa in rethei se, miin a thawhchuah mil tawk a hmuh chuan rethei mahse a hlim tih corporator hian a sawi a. Tel, dal thlenga ration-a sem dan ngaituah a ngai tih a sawi.
“Ram changkangah chuan elementary education an ngaipawimawh. A naupang pang enkawl turin mithiam thiam an dah. Sawi tur tam tak zingah health care tha, zirna tha hi kan mamawh hmasa a ni,” a ti.