THIL PEK!

Zoremi Hmar Zote

Hriatrengna chhuahsan duh hauh lo ngaihtuahna chimawm, lunglen bawm sawh keh a, nun hlui ngaihna vaivut lo bel deuh tawh cho phut a, khum laizawl atanga kum sawm tam liam ta-a min hruai let fahran ziah chu he ‘khrimas’ hi a ni. Pu Patea’n, “Lal pian hun pian hun pangpar a vul leh ta,” a tih hi, tlangsam par hi a nih ka ring nghet hmiah thin! Kawr thar neih a hnai a, ruai kan theh ngei ngei dawn bawk vei rawl nen, krismas ti ‘masi-tu’ ber mai balloon leh hamrik te, kum tluana kan neih phak loh kan lawm zawng thil kan dawhthla dawn tih hriatna te chuan hriselpui thamin min tihlim thin a nih kha maw!
Tunah zawng, khawvel changkannain min nang a, kawr thar pawh hlut bik tur awm lo khawpa zingin kan nei ta zut a. Kan naupan laia thingrema kan nu ten kan masi kawr tur an dah that, kan en ruk ngunzia te, nu leh pate pawhin an mita mawi ber an fate min hak chhintir ngunzia te kha sawi chiam mah ila tun lai naupangte hi chuan an hre thiam lo hial mai thei! Vawk phing a ropui tawh lo va, chhangban kan aia tui a lo tam tawh bawk nen, awmtual mei ai ngai lovin heater tha tak tak kan hung thliah thluah tawh a. Krismas ruai thlahlel lo khawpa sa hmeh ngun kan lo nih takah phei hi chuan, ‘hman lai sa kha tun lai sa aiin a lo tui bik em mawni chu aw,’ tih vung vung mai awl deuh a ni. Naupan lai masi kha a nuam ber kum tin a; nun nuam ta lutuk hian nun hlimawm min zuan kantir ta dawrh dawrh mai a nih ber hi.
Ka sawi tum tak ka sawi hmain parawl tho fuh sermon zat zet ka sawi hman dawn alawm le!(Engah ka lung a len teh ei!) Krismas kan hman chhan nena inhmeh em em ber mai chu thilpek pek hi niin ka hria. Thil thlâwn pêk hlu ber Pathianin min pek avanga hmang kan nih ang ngeia a tam thei ang ber pek chhuah nana hun duhawm ber a nih avangin, a let tam tak malsawmna dawng duh tan chuan rinna thlai chi theh hun a ni a, kan Pathian duh zawng a nih miau avangin a thlawn dawn lo tih hre chiang apiangin midang tana malsawmna nihna hun tha atan an hmang a, an inchhir ngai reng reng lo. Thilpêk reng reng, a petu nih leh a dawngtu nih hi a nuam ve ve a, a dawngtu tan lawmnaa a tâwp mai laiin a petu-ah erawh chuan lungawina, hlimna leh mahni inrintawkna te a keng tel a, mi thilphal reng reng ei leh bar silh leh fên kawnga mualpho an awm ngai lo. Suma lei theih loh hlimna a thlawnin an dawng nghal a, hausak leh retheihin awmzia a neih hauh lohna, thlamuanna duhawm em emin a ûm zui thin.
Mi thenkhatin, “Kan Zoram hi a chhe tawh lutuk a, engkimah kan hnam nunphung leh zia rang a dal zo va, sualna a pung a, Pathian hremna kan hmachhawn hun a awm ngei ngei dawn,” ti zawng hian an sawi thin. A lu buk nazawngin kaihza dursuih uih uih chunga meng âr mit duarin, “Sadawm leh a gamera(Sodom leh Gomora) kan chang zo tawh!” an ti thla zen te hi a tul ber lo. Pathian chan ve tur bo thak khawpa setana luah hneh ang hrima setana sawi vul hi a tul hlek lo! Kan la chhe vek lo va, Zoram hi sualnain a la khat vek hauh lo. Veng tinah hian mi sual kutzungtang thliah tham lek chu kan awm ve a ni mahna; mi sual lo kan la tam fe zawk, chhiar dawn ngat ila kutzungtang leh kezungtang paw’n a daih teuh lo; kan beng pawh chhiar tel ila a la daih chuang lo! A hrim hrimin, thil reng reng, a êng zawnga thlir hi kan zir a ngai a ni.
Thu rumra tak tak puang a, kan chhiatna lai aupui vak vak, si hluam hluam ho hian kan Pathian chak zawkzia hi an ringhlel zawk a ang ka ti thin. Sualna a pun thu chu a dikna chen a awm ngei a rinawm rualin, krismas a lo thlen te, thihna leh chhiatna lian tham, lei min leh thildang vanga vanduaina kan han tawh chiah hian kei chuan, “Mizo nih hi a va nuam teh lul em,” ka la ti fan!
Kan la tlem ang aiin fahrah enkawlna hmun kan ngah tih chu kan beng neih zat kan chian tluk zetin kan chiang a, a pawi hle bawk. Tu duhthlan mah a ni bik lo va, vanduainain lal a hrawtna hmun, lei hrehawma cheng kan la nih si avanga thil thleng palh thin a ni. Mahse maw…Zoram mipui ten chanhai leh riangvai, fahrah leh rualbanlo kan hmangaihzia sawi ngai lova a lan chian em emna chu, heng mite hnena krismas thil pek kan hlan hnem thinzia leh, kan tlawh nasatzia te hi a ni.
Ni e, kuminah pawh hian lo ngai reng mah rawh, kristian ram nih inhmeh em em turin Pathian mite an han che leh mah na’ng a, hausa lua lo pawhin theih ang tawka an taivawn dapin, an luang chhuak leh zawih zawih dawn! A pawl ang te, thian zaho leh mimal pawhin, Pathian fate, a hmangaih em em, an chunga kan tih apiang ama chunga kan tih anga a chhàl hialte hnenah hian, Lal lung tiawi ngei ngei tur khawngaihna mak, mawi leh duhawm an lantirna hmuh leh hriat tur a tam leh dawn aw!
Hei, nei zo ve lo leh harsa zawkte hnena engmah pe lova krismas hman hi a chakawm lo riau, van ami khian engmah min pe duh tawh bik lo ta se, min pe dawn a nih pawhin kan pek chhuah hu zel chauh min pe tlat mai ta se… Aizeee, a chi loh reng reng! Theih ang angin tang ila, a ropui emaw, ropui lo emaw, a tam emaw, a tlem emaw pawh ni se; pe ve hrim hrim zawk mai ang u.