Thil siamte chhantu khaw 5 hnenah chawimawina hlan

On Jan 20, 2025 9 0

Thil siamte chhantu khaw 5
hnenah chawimawina hlan
Environment humhalhna kawnga thawktute chawimawina, Lalthara-te Unau Foundation in a hlan thin chu kumin atan thil siamte chhanhim kawnga hma la tha khaw panga hnenah hlan a ni.
Unau ho intelkhawmin an din, Lalthara-te Unau Foundation (LUF) hian kuminah hian nungcha leh an chenna tur ramngaw humhalh lama hma la tha khaw panga – Zote (Champhai district), Tualbung (Saitual district), Leng, N Mualcheng (Serchhip district ve ve) leh Rulkual (Lawngtlai district) hnenah chawimawina hi an hlan a. Chawimawina hian sumfai cheng nuai khat theuh a keng tel.
LUF hian kum 2023 khan a tumkhatna atan environment humhalh lama hna thawk tha nia an thlan 5 – Centre for Environment Protection, Biodiversity Management Committee Sailam, Mizoram Zoological Society, Save Mizoram Rivers leh Youth for Environment Justice Mizoram hnenah chawimawina an hlan.
Kum 2024 khan environment humhalh lama thawk tha mimal 6 – Vanramchhuangi, K Lalmuansanga, C Lalbiakzama, Romawlsawma, PC Lalnunzira leh C Lalsangpuia te hnenah an hlan leh a ni.
Chawimawina an hlante hnenah hian sumfai cheng nuai khat hi an hlan tel zel a. Tun thlengin chawimawina sumfai bikah hian Rs. 16,00,000 an hmang tawh.
Environment humhalh kaihhnawiha NGO-in an mamawh phuhrukna atan Rs. 95000 an hmang tawh a. LUF vek hian zirlai khawsak harsa, thiamthei si puihna atan pawh sum hmangin, Ahmedabad-a engineering college-a zirlai pakhat leh ZMC Falkawna MBBS zirlai pakhat chu kum 2023 atang khan ‘sponsorship’ an la pe zel a, Aizawla nursing zirlai pakhat chu kum 2024 atang khan an pui tan bawk. Heng bik atan hian Rs. 3,41,000 hman a ni.
Tum khata han puih zauh zirlai an nei bawk a, Arunachal Pradesh-a BSc (Horticulture) zirlai chu a mamawh khawl leh thildang leina atan leh, school admission, uniform leh lehkhabu leina nei lo leisakna atante Rs. 1,10,000 hman a ni.
LUS sum hi dam lo harsa tan pawh hman thin a ni a, Rs. 9,05,800 hman a ni tawh.
Heng bak hi charity hrang hrangah Rs. 3,66,000 semchhuah tawh ni bawkin, tun kum thum chhunga a vaia sum an hman tawh zawng zawng hi Rs. 33,22,800 a ni.
LUF dintute chuan chawimawina leh puihna atana sum an man hi LUF atana sum dahhran pung atanga pek thin niin, damlo tanpuina leh charity atana pek erawh LUF chhunga tel leh an chhungkuaten a tul anga an thawhkhawm thin a ni tih an sawi.