Thil tihfai dan tha lo

Thil tihfai dan tha lo
In tihfai taima tak i nih chuan hei hi chhiar ngei ngei rawh. Chhuat nawh atanga almirah hruk fai thlengin, bal ngaithei lo chi i ni. Mahse, in i tihfai leh dawnah tuna i chhiar tur hi hre reng la, fimkhur nan hmang ang che. Tun tumah hian Times of India health section-in thil tihfai laia kan tihsual leh tih dik loh thin ni a an sawi te kan rawn tarlang e.
1. I pawnchhe hman ngai kha thil chi hrang hrang hruk fai nan i hmang a nih chuan kha pawnchhia a germs kai kha hmun hrang hrangah i thehdarh tihna a ni. Chuvangin, thi chi hrang hrang te a hrukfaina bik nei ang che, pawnchhia te pawh a ngai hman reng loh tur.
2. Feather duster i hmang ngai em? Hman a chakawm a, a that hmel riau bawk thin, mahse, heng feather duster te hian hmun hrang hrangah bal an thehdarh mai mai zawk a ni. Thil hrukfai nan i hman khan vaivut leh bal dang te chu a hrufai ve bawk a, mahse, hmundang i va hruk leh khan chutah chuan a hmaa i bal hrukfai tawh kha a chhawp phei ve leh mai mai zawk a ni. Heng feather duster te ai chuan microfibre cloth te hi hman a tha zawk.
3. I chawhmeh chan thleng (chopping board) kha tui a tleuh thuak emaw thleng silna sahbawn a han nuai ve thuak emaw kha a tawk emaw i tih chuan i ring sual ang. Chopping board te hi lo zai/sak chik/khuar a, chungah chuan cross-contamination a awm thei. Chopping board i silfai hnuah pawnchhe fai vinegar, ser leh chitui ah chiah la, chumi chuan hrufai leh ang che.
4. Kawngkar pawh hawnna leh tui herhhawna (tap) te hi kan khawih tam ber pawl an ni chung hian a tihfai hi kan ngaihthah leh em em si a, chuvangin germs chi hrang hrang inthlahpunna hmun tha tak a lo ni reng thei. Microfibre cloth ah cleansing solution tat-in chumi hmang chuan hrukfai thin tur a ni a, wipes hmang te pawhin hrukfai thin tur a ni.
5. Bawlhhlawh bawm i tifai ngai em? Bawlhhlawh bawm te hi kar khatah vawi khat tal tifai thin tur a ni. Hei hian bawlhhlawh bawm rimchhe tur a veng a, tui leh sahbawn a silfai hnuah nisaa phoro leh thin tur a ni.
6. I thlengsilna nawhfe kha i tifai ngai em? Nawhfe hmangin thil kan tifai a, mahse, a nawhfe a ber chu tihfai kan tum leh thin lo a, germs an lo awm thei. Nawhfe (sponge) tihfai dan tha tak chu microwave i neih chuan minute khat vel ti lum kha a tawk viau. Microwave i neih loh pawhin nawhfe chu chi, sertui leh tui chawhpawlhah zan khuain i chiah dawn nia.