‘Thildang zawng zawng aiin chhungkua ka ngaipawimawh’- Miley Cyrus

‘Thildang zawng zawng aiin chhungkua ka ngaipawimawh’- Miley Cyrus
A nu leh pa, Tish leh Billy Ray Cyrus te nen an boruak a tha lo ni a sawi a tam hle karah Miley Cyrus chuan a hla thar ‘More to Lose’ a tichhuak a, May ni 10 khan an chhungkaw chungchang a sawi neuh neuh awm hi a rawn chhang let nghal bawk.
Miley chuan, “Thulengvak hi ka chhang buai peih ngai lo, mahse, ka nu nena kan inlaichinna hi chu a nghet em a, kan inkarah thildang tlazep thei a ni lo. Ka thiantha ber a ni,” a ti.
Tish hian kar liamta, kar tir lamah khan Miley hi social media-ah a unfollow niin an sawi a, hei hian an nufa inkarah thulengvak a titam ta a ni. Miley chuan, “Nu dang tam tak ang thoin ani pawhin a phone a hmang thiam tawk lo a, engtin tin emaw a tihkualna lamah min unfollow palh mai a ni- a ho khawp mai, tihpalh a ni, ngaihven hluai tur khawp a ni lo,” a ti.
Miley chuan a pa nena an inkar pawh sawiin, “Ka pa nen hian engtik emaw lai khan harsatna deuh te chu kan nei ve a. Tunah chuan kum 30 ral ka lo kai ve tawh a, chhungkua hi engkim aia ka dah hmasak a ni tawh. Hunin hliam tam tak a tidam a, kan inkarah lei kan dawh thar bawk a, rilru nuam takin ka awm. Kan chhungkua a hriselna leh hmangaihna luang vel avangin ka lawm a ni,” a ti bawk.
Tish pawhin social media lama a hriat loh laia a fanu a unfollow chungchang hi sawiin, “Engtin nge khatiang kha a lo awm pawh ka hre lo tunah chuan a dik leh vek tawh,” tiin Instagram-ah a post ve bawk a, Billy Ray Cyrus pawhin Miley-i’n piano a tum lai video clip post-in, “He nula hi hmuh thuai ka chak tawh. Hun hi a lo va liam chak tak em,” a ti ve bawk. Billy Ray Cyrus sawi takah chuan Elizabeth Hurley nen tunlai hian an in-date thar e.