Thing phunna tur hmun thlang

Thing phunna tur hmun thlang
Kumin Green Mizoram Day hman dan tur chu district level committee ten an rel zel a. Thing tiak phun tharna turte ruahman a ni.
District Level Committee Committee on Green Mizoram Day chu Thawhlehni khan an chairman, district bawrhsap John LT Sanga hoin an thukhawm a. Kolasib DFO Margaret Lalramchhani sawi danin, kumin Green Mizoram Day denchhen hian Kolasibah thing tiak 10000 a thlawna semchhuah tum a ni.
Thutkhawma tarlan danin, kum 2021- 2022 Green Mizoram Day denchhenin thing tiak 2857 phun a ni a, ram kang tur ven kawnga hma la tha khua endik mek a ni. Kumin hian “Thingphun ila, I enkawl zui ang u” tih thupuia hman tur a ni. Excise & Narcotics Department Complex Khuangpuilam leh BDO Thingdawl Compound-ah te thing phun tura ruahman a ni a, hei bakah hian office, school leh pawl anga thing tiak phun duh tan a thlawn a sem tur ruahman a ni.
Lawngtlai District Level Committee on Green Mizoram pawh Thawhlehni khan SDO (Sadar) Daniel Sailo hovin an thukhawm a. Report danin, nikuma Lawngtlaia Green Mizoram Day hmannaa thing tiak 350 phun chu a vaiin a nung vek a, ngun taka enkawl zui a ni tih sawi a ni.
Kaladan Multi Modal Transit Transport Project kawngpui kamah, nikum lama thing phun tawhna hmabakah kumin hian thing tiak 380 phun nise, an ti a. Kangmei ven kawnga thawk tha khua/ veng thlanchhuahte hnenah lawmman hlan a ni ang. Nakkum Green Mizoram Day hman hunah thing phun enkawl tha ber hnenah lawmman hlan nise, an ti a. Nakkum lama Green Mizoram Day hman hunah kawngpui kama thing phunte hlamchhiah si loin, sawrkar hmun ruak remchang lai, ramngawa siam theih tur zawn lawk a, ramngaw siam tura hma lak nise, an ti bawk.
Green Mizoram Day hi June 11 a ni a, kuminah Pathiannia a tlak avangin State Level Committee-in a lo rel tawh angin June 9-a hman tum a ni.