Champhaia district-a sawrkar laipui sum hmanga hmalakna ho thlirlet

Champhaia district-a sawrkar laipui
sum hmanga hmalakna ho thlirlet
Champhai district-a sawrkar laipui sum hmanga hmasawnna hnathawh scheme hrang hrang zirchianga enfiahtu, District Development Coordination & Monitoring Committee (DDCMC/ DISHA) chu an chairman, MP C Lalrosanga hoin Thawhlehni khan Champhaiah an thukhawm a. 2022- 2023 sawrkar kum third quarter leh final quarter (October 2022 atanga March 2023) chhunga hmalakna thlirlet a ni. DISHA co-chairman, MP K Vanlalvena pawh a tel.
Report danin, MGNREGA hnuaiah kum 2022- 2023 chhung khan job card holder 18132 hnenah ni 100 inhlawhna siam hman niin, PMAY-G Awaas+ 2021- 2022 hnuaiah in sak hamthatna dawng tur 372 thlan zinga 209 te 1st instalment pek an ni.WDC-PMKSY 2.0 hnuaia project pahnih, cheng nuai 700 ve ve senna tur kalpui mek a ni a; sawkar laipui tum tur fund 19.45% hmuh tawh a ni. BADP hnuaiah hna 17, cheng nuai 253 senga thawh niin heng zinga 16 hi zawh tawh a ni. MzSRLM hnuaiah SHG 648 din a ni a. Kum 2020 atanga kalpui tan Mission Amrit Sarovar kaltlangin hmun 80 ah dil /tuikhuah siam zawh a ni tawh.
Jal Jeevan Mission kaltlangin project 12 zawhfel tawh niin, 2022-2023 atan Champhai district khaw 30 ah tuilakna leh in tina tui connection pekna tur project kalpui mek a ni a. NABARD RIDF- XXVIII hnuaiah Farkawn Water Supply Scheme (Solar pumping) cheng nuai 1595.72 hmanga siam tur tender chhuah tawh a ni. NLCPR hnuaiah nuai 1988 senga siam Keilungliah lui khuah chu hawn a ni tawh a. PWD hnuaiah PMGSY kawng pali – km 53.9 a thui siam zawh a ni a. PMKSY hnuaia minor irrigation project 7 bakah NABARD hnuaiah project 1 kalpui a ni a. Ground Water Irrigation Scheme kaltlangin leihnuai tui verh hmanga tuilakna tur project 4 kalpui niin, heng zinga pakhat hi Mizorama leihnuai tuiverh hmanga tuilakna hmasa ber ni turin hawn a ni tawh.
Hemi hun chhung hian nau piang 862 leh thi 12 awmin Infant Mortality Rate (IMR) chu 20.88 a ni a. Nu nau chunga thi 1 awmin Maternal Mortality Rate (MMR) chu 116 a ni a. Health Sub-Centre 30 chu Health & Wellness Centre-ah hlankai an ni tawh a, Sub-Centre Clinic 15 siam a ni bawk. Mi nawlpuiah HIV test tihsak mi 1944 zingah 62 (3.19%) an positive a. Naupai mi 1362 test zinga 7 (0.51%) an positive. HIV positive zingah mipat hmeichhiatna hmanga kai an tam ber a ni. Vector Borne Disease Control Programme kaltlangin malaria case 9 – Pf 6 leh Pv 3 hmuh a ni a. TB vei hmuhchhuah 68 zinga 5 in an thihpui. Samagra Shiksha kaltlangin cheng nuai 225.48 sengin school sakthat, toilet leh tui dahkhawlna siam hnate thawh a ni.
Champhai district-ah Ration card leh Aadhaar thlunzawm hna zaa 99.21 zawh tawh niin, beneficiary nena thlunzawm hna zaa 94.16 zawh a ni. AAY card 1824 hnuaiah beneficiary 4196 leh PHH card 9381 hnuaiah beneficiary 41212 awmin, an tan hian a thlawnin buhfai quintal 16428.40 pek a ni. National Social Assistance Programme hnuaiah tar chawmna mi 1337, hmeithai pension 153 leh rualbanlo pension 37 te pek mek a ni.