Thingtlang lama themthiam thilinzirtirna tur lirthei duang thar

Thingtlang lama themthiam thil
inzirtirna tur lirthei duang thar
Thingtlang kilkhawr zawka kut themthiam thil inzirtir a tul changa a zirtirna hmanrua kengtel lirthei duan – ‘Skills on Wheels’ chu Labour, Employment, Skill Development & Entrepreneurship department a nei thar a. Thawhlehni tlai khan LESDE minister Lalnghinglova Hmar chuan a khuh hawng.
‘Skills on Wheels’ lirthei hi a bika duan, skill development training-na bungrua/ hmanrua hrang hrang phur theia duan, mobile training centre anga hman tur a ni. Skill development /vocational training job role thlan bikte thingtlang khaw hla leh kilkhawr zawka skill development training pekna tur a ni a. A bultanna atan assistant electrician training leh mason general training pek phawt tum niin, training job role hrang hrang pawh a tul dan anga kalpui tum a ni.
Sawrkar laipui Ministry of Skill Development and Entrepreneurship hnuaia project pakhat, SANKALP scheme – State Incentive Grant (SIG) 2 atanga hmuh a ni a. Mahindra Bolero camper 4wd PSD, m2DiCR4 (5 seaters) hman niin, a leina leh customize-na atan, skill training-na hmanrua leina nen a vaiin Rs. 17,05,170 sen a ni.
Mizoten skill kan nei mai zel laiin, eizawnnaa hmang tur chuan sawrkar pawmpui a ngai thin a. A bikin thingtlang tan he hmalakna hi a tangkai dawn tih LESDE minister hian a sawi a. Skill development kalpui department dang tan pawh a tangkai dawn, tiin, thla thar atangin lirthei hi chhuak tan thei tura beisei a ni tih a sawi.