Thingtlanga khawsak harsa zawkte tan thawh dun tum

Thingtlanga khawsak harsa
zawkte tan thawh dun tum
Mizoram thingtlang khuaa cheng chhungkaw harsate chhawmdawl kawnga chak zawka hma lak a nih theihnan Rural Development & Administration department leh Bharat Rural Livelihood Foundation (BRLF) chuan kum thum chhung atan thawhdunna thuthlung ‘memorandum of understanding’ an ziak.
BRLF hian Mizorama rural development kaihhnawih, sawrkar scheme leh programme hrang hrang awmze nei leh hlawk zawka kalpui theihnan state sawrkar a thawhpui anga, natural resource management hnuaia activity hrang hrang, tuihna humhalh, ramngaw leh nungcha humhalh bakah agriculture productivity lama thingtlangmiten hmasawnna an neih theihna tur kawngah department ho leh an scheme neih hmanga thawhho (convergence) dan tur ruangam a siam ang.
Central schemes hrang hrang awmze nei zawka kalpui a nih theihnan Rural Development & Administration department nen an thawk dun dawn a ni.
Thawhdunnaah hian thingtlang loneitute tan tui luangral tur humhalh, hlawk zawka lei hnuai tui hman tangkai, pesticide tel loa agriculture lam nasa zawka kalpuina tura hma lak, loneitute thar chhuah hlawk zawka kalpui tum a ni. BRLF hian a tul angin loneitute hnenah training an pe thin bawk ang.
MoU ziahnaah hian RD&A minister Prof Lalnilawma leh department hotu dangte an tel a ni.