Third round lut zo lo Casper Ruud

Wimbledon 2023 khelh mekah ningani khan inlehthalna lian pahnih a thleng a, mipa lamah champion tura rinkai zinga mi Casper Ruud chu second round paltlang zo lovin a tla. Ruud rual hian Taylor Fritz pawh Mikael Ymer hneh lovin a tla ve bawk. Veteran player zingah Stan Wawrinka chuan third round a lut a. Grand Slam-a vawi thum champion tawh Wawrinka hian nizan khan Novak Djokovic a hmachhawn zui leh.
British number five Liam Broady hian Wimbledon a chetthat harsat thin Casper Ruud lakah bul a tan tha viau a, set khatnaah break vawi khat a neih a chhawr tangkai a. Game li hloh chungin set a la. Set khatna a hloh hnuin French Open leh US Open final-a tlawm tawh Ruud a insiamtha a, khawng takin Broady a bei let. Set hnihnaah break a neih chhawr tangkiin awlsam takin set a la a. Set thumnaah tha taka inlan zui lehin, set ala zui leh. Set hnih a lak zawn vangin chak zui mai tura rin a ni hman tawh a, hun pawimawh leh boruak sangah a zuih ta tlat thung.
Tualchhung tlangval a nih vanga tantu nei tha tak Broady hi set hnih a hloh zawn hnuin huaisen takin a inlan a, tha zetin World No. 4 Ruud a bei let a, rin phak bakin a chetha zui ta hial bawk. Set linaah game thum hloh chungin Broady hian set a la. Set hnih ve ve an lak hnuin deciding set-a tha chung-chuang takin Broady a inlan zui leh a, set nganaah game khat lek pawh a hloh duh lo. Khingpui hautak Casper Ruud chu 6-4, 3-6, 4-6, 6-3, 6-0 a in a hneh a, ropui takin second round a inhlangkai ta a ni.
Casper Ruud chak loh rual hian tawnhriat ngah Taylor Fritz chu second round paltlang zo lo lovin a tla ve bawk. American ninth seed Fritz hian World No. 59 Mikael Ymer a hmachhawn a, tha takin bul tan mah se a tawp a khar tha thei lova, a tla ri ngawt. Champion tura rinkai zinga mi Fritz lakah set hnih a hloh hnuin Mikael Ymer hi huaisen takin a inlan a. A huaisenna leh a thawhrimna zarah 3-6, 2-6, 6-3, 6-4, 6-2 a hnehna changin third round a inhlangkai.
Mipa lama inkhel ngaihven hlawh dangah Grand Slam-a vawi thum champion tawh Stan Wawrinka chuan second round-a a khingpui Tomas Martin Etcheverry lakah set khat hloh mah se 6-3, 4-6, 6-4, 6-2 in hnehna a chang a, third round a lut. Tawnhriat ngah Wawrinka hian third round-ah champion lai Novak Djokovic a hmachhawn zui leh. Wawrinka hian zirtawp zana a hmachhawn Djokovic hi French Open leh US Open final-ah a lo hneh tawh a. Inkhel pawimawh takah vawi hnih a lo hneh tawh Nole hi Wimbledon-ah bik chuan atan hneh ngaihna awm lo ang hialin a sawi a, a huphurh hle.
Ningani a chak langsar zingah Andrey Rublev, Alexander Zverev leh Matteo Berrettini te an tel. 7th Seed Rublev hian a Russian pui Aslan Karatsev lakah set a hloh hmasa zet hnuin 6-7 (4-7), 6-3, 6-4, 7-5 in hnehna a chang a, third round a lut. Rublev leh Djokovic te hi an chak zel a nih chuan quarter-final-ah an inhmachhawn ang.
Alexander Zverev pawhin inkhel hautak tak a paltlang ve bawk a. A khingpui Dutch qualifier Gijs Brouwer chu 6-4 7-6 (7-4) 7-6 (7-5) in a hneh thei hram. Wimbledon-a final pawh lo lut tawh Berrettini chu 6-7 (5-7) 6-3 7-6 (9-7) 6-3 in a chak hram bawk.