Thirfian leh blade dawlh vangin thi?

September 1 zing dar 7.15 khan Hmangaihthanga (37), Kolasib chu pumna avangin a thi a, a ruang hi a unaupa Lalbiakchhunga, Lengpui chuan la in hemi ni vek hian vui a ni.
Thudawn danin Hmangaihthanga hi rilru lama harsatna nei niin, TNT Home Champhaia dah a ni a, heta tang hian kumin May khan tlanchhuakin awmna bulfuk a neih loh hnuah Kolasib-a Shopping Centre bul velah zan thum emaw vel a riak tawh a; auto rickshaw driver thenkhat chuan YMA Diakkawn Branch hruaitute an hrilh a, Diakkawn YMA hian bawhzuiin kumin June 1 khan TNT Khuangpuilamah an dahlut ve leh a ni.
Tunkar Thawhtanni khan thirfian leh cutter horse blade a dawlh nia sawi a ni a. thirfian hi a luakchhuak leh a ni. A pumna avang hian Ningani zan khan District Hospital Kolasib Casualty panpui a ni a, damdawi in khum a indaih loh avangin Nazareth Nursing Home Tumpui ah sawn a ni. Damdawi inah pawh Diakkawn YMA hruaitute hian an ngaihven zui zel a, damdawi in senso hi an tumsak a, a thih hnuah kuang siamsakin an thlahliam tih thudawnna chuan a sawi.