Thisen hlu

Valentine’s Day puala thisen pek hi kum 2010 atanga kalpui tan kha niin, 2025 thlenga V-Day puala thisen pek tlingkhawm hi he thu buatsaih laia hriat theih chin chu unit 11,621 a ni.
Valentine’s Day hi a tawi zawngin Hmangaihna Ni ti mai ila, a fiah ber mai awm e. Kan hre vek a, Kristian-te tan chuan Thisen hlutna hi a chiang lehzual ngei ang.
Mihring taksaah hian a eng ber hi nge nunna petu ni ang tiin mithiamte chuan an lo chhui nasa tawh thin a. Thluak, Thin, Lung, Chuap etc. te an han thlurbing a, a tawpah heng taksa peng pawimawh zawng zawngte hi ‘Thisen’ tel lo chuan an lo awm thei reng reng lo mai tih an hmuchhuak a.
Nunna petu Thisen kan han inpe liam liam thei te hi Pathian themthiamzia lan chianna zel a ni a. Thisen ni lovin, kan taksa peng dangte hi nunna ber lo ni tlat mai se chuan, kan inpe mai mai lo tawp ang.
Chuvangin, Thisen kan inpe liam liam theite hi a ropuiin a hlu a, a ropuizia leh a hlutzia hi kan hriatchian poh leh thisen inpek te hi kan phurin kan ngaipawimawh lehzualin a rinawm a. Tuna blood donation system hrang hrang kalpui mek avang hian nunna sang tam tak chhanchhuah an lo ni tawh a, blood donation hlutna hi kan inhrilh mawlh mawlh reng a pawimawh hle a ni.
Mithiamten thisen hi rei tak a dam thei lo an tih avangin, thisen pek dan pawh hi a inpha man tawk tura awmze nei taka duan a pawimawh dawn hle a. Tunah hian YMA lam leh Blood Bank lam hian thisen pek dan tur calender te pawh an duang nia hriat a ni a, hei hi kohhran hrang hrang hnuaia thalai pawl hrang hrangte nena zau zawka duan theih ni se a duhawm lehzual awm e. Chumi kar laka mimal leh group tenau zawk ten an lo pek ve reng bawk chuan, chatlak awm lovin inpha man mawi tawkin thisen hi blood bank lamah pawh kawl theih a nih a rinawm.
‘Miin a thian tân a nun a pêk aliama hmangaihna nasa zâwk tu man an nei lo’ tiin Bible-ah kan hmu a. Nun pek tih hian thisen a kawk nghal a, nunna chân kher lova midang tana hmangaihna kan lantir theihna ‘blood donation’ hi kan hlut deuh deuh theih nan uar zawkin awareness campaign kalpui ila, a tha hle awm e.