Thla 7-a chhiah lut vbch.786 GST-a lakluh la pung thei lo

Sawrkar kum kal mekah October thleng khan Mizoram sawrkar chuan chhiah chi hrang hrang atangin cheng vaibelchhe 786.14 a lalut a. Goods & Services Tax khawn tam lamah Mizoram chu a hniam ber pawl a la ni rih zel.
2025- 2026 kal mekah April atanga October thlengin Mizoram hian chhiah Rs. 786,14,26,940 a hmu tawh a. GST atanga lut Rs. 543,19,83,199 chu a tam ber a ni chungin, May atang khan thla khat chhungin cheng vaibelchhe 80 luh tlin tum a la awm lo.
April-ah GST-ah hian cheng vbch. 106.81 hmuh tlin a ni a; October-a vbch. 77.70 hmuh chu a sang ber dawttu a ni. August kha a hniam ber tum niin vbch. 63.79 a lut.
Salex Tax Rs. 166,37,01,075; Profession Tax Rs. 11,95,82,092; Road Maintenance Cess Rs. 32,30,60,287 leh Social Infrastructure & Services Cess Rs. 32,30,60,287 chu a luhna dang a ni. Taxation department-in tax a lakna dang Entertainment Tax-ah he thla sarih chhung hian Rs. 40000 a lut.
Sawrkar laipui Ministry of Finance-in thla tina India ram state leh union territory tin chhiah lakluh dan, a bikin GST-a a lakluh dan a chhinchhiahnaah 2024 leh 2025 November khaikhinna, a pun leh tlakhniamna a siamah Mizoram chu GST lakluh kiamna nasa pawl (-41) a ni a; hmarchhak state bikah pawh lakluh zat kiam nasa ber a ni.