Thla hnih chhungin zu man hnem

Zu hi man tur a awm reng a, a sen chi chu thuhran ni se, tualchhung zu pawh a tam a ni ang, a mantute’n an man hnem. Kuminah pawh excise force te’n an man hnem leh tawh hle.
Mizoram Excise & Narcotics (MEN) department-in kuminah January leh February-ah khan rakzu litre 12,608.010 an man a, thla hnih chhungin litre sing chuang an man tawh.
MEN department chhinchhiahna enin, 2020-ah khan rakzu hi litre 46,083.762 an man a, 2021-ah litre 40334.032, 2022-ah litre 75701.595, 2023-ah litre 81221.885 an man.
2020 hnuah an man zat hi kum tin a pung tih a lang a, kuminah pawh January leh February-a an man hi thla hnih chhung leka mi-ah chuan tam tak a ni.
Zu bilh lai (fermented rice) pawh January leh February-ah khan tin 23,484 an man a, zu siamna bungbel 294 leh dawidim (yeast) 1000 an man bawk.
MEN department hotute chuan zu hi Aizawl bul velah a pung a, Aizawl bul vela zu sate an lian telh telh tih sawiin, khaw dang hla taka an man te pawh hi Aizawl vela mi a lo ni leh tlat thin tih an sawi.