Thla khat chhungin heroin nuai 11 chuang hu man hman

Tunhnai thla khat chhung vel khan Champhaiah heroin cheng nuai 11.8 chuang hu man a ni.
District Level Narco Coordination Centre (NCORD) Committee Champhai District thutkhawm vawi 10-naah report danin, kumin June 22 atanga July 21 thleng khan Champhai District Police chuan ND&PS Act 1985 hnuaiah case 15 an ziaklut a, hemi kaihhnawihah hian mi 24 manin, heng zinga pahnih hi ramdangmi (foreigner) an ni. Heroin gram 5006 an man a, department lam chhut dan chuan tualchhunga an hralhna angin Rs. 1,12,08,000 hu a ni. Hemi hun chhung vek hian Methamphetamine mum 202000 (kg 22.641), tualchhung rate-a chhutin Rs. 40,400,000 hu an man bawk.
Excise & Narcotics Department Champhai chuan ND&PS Act 1985 hnuaiah tho hian case 12 ziaklutin, hemi kaihhnawihah hian mi 12 an man a, ramdang mi an tel lo. Heroin gram 516, department lam chhut dana tualchhunga hralhna anga Rs, 6,18,648 hu an man bakah ruihhlo phurhna lirthei pathum an man tel.
Heng bakah hian, hemi hun chhung vek hian Assam Rifles COB Champhai leh Zokhawtharin operation tum 6 neiin heroin gram 409.42 leh Methamphetamine mum 20000 an man.
Champhai SP Lalrinpuia Varte report danin, kumin kum bul atanga July 16 thleng khan ND&PS case kaihhnawihah mi 73 man an ni tawh a, an zinga 63 chu mipa niin a dang 10 chu hmeichhia an ni. Man zinga 53 chu Mizorama cheng an ni a, ramdang mi 10 leh state dang mi 10 an awm tel.