Thlaah Puk hmu

Scientist-te chuan Thlaah puk an hmuchhuak a. He puk hi 100m vela thuk nia ngaih niin mihring tena inbun nana an hman theih a nih an beisei thu an sawi.
He puk hmuhchhuah hi thla leilunga puk tam tak zinga hmuhchhuah hmasak ber a nih rin a nih thu researchers te chuan an sawi a.
Khawvel ram hrang hrang ten Thla chu chenna atana hman tuma an intlansiak mek lai a ni a. Heng puk te hi radiation, extreme temperature leh space weather laka astronauts te himna atana hman theih tura ngaih a ni bawk.
British astronauts space a zin hmasa ber Helen Sharman chuan tuna Thlaa puk hmuhchhuah chu base atana tha a nih a beisei thu sawiin kum 20-30 hnu velah chuan lunar pits-ah mihring an chen theih a beisei tawh thu a sawi bawk.
Mahse he puk hmuhchhuah hi a thuk em avangin astronauts te chuan luh leh chhuah nan ‘jet packs emaw lift’ emaw an hman a ngai ang a ti bawk.
Lorenzo Bruzzone leh Leonardo Carrer, University of Trento, Italy te chuan he puk hi radar hmanga an hmuhchhuah niin lei atang pawha hmuh theih niin kum 1969-a Apollo 11 tumna atang pawhin hmuh theih a ni, an ti.
Kum billion tam tak kal tawha Thlaa lava luangin puk hi a siam nia rin a ni a. Kan chenna leia Lanzarote, Spain a tlangkangin puk a siam chu a ang teuh ber a ni ang, tiin Prof Carrer chuan a sawi.
Prof Bruzonne leh Prof Carrer tena puk len lam an hriat fiah hnuah lunar base atana hman theih a nih rinna an nei nghal a. “Kan chenna leia nun pawh hi puk atanga intan a ni a, chuvangin Thlaa pukah mihring te nun a intan thei” tiin prof Carrer chuan a sawi.
Puk chu la belhchian tak tak a ni lo va, mahse, researchers te chuan radar, camera emaw robot te hmangin belhchian theih a nih an ring bawk.
Scientists te chuan kum 50 kal tawh atang khan thlaah puk a awm an ring tawh a. Kum 2010 khan Lunar Reconnaissance Orbiter mission chuan khuar thlalak puk luhna ni awm ang tak tak a lo la tawh bawk a ni.