Donald Trump chuan Ohio senator J.D. Vance chu US presidential election ah a running mate atana thlangin, Vance hi Trump lo sawisel nasa tawh thin tunah erawh Congress-a Trump tana rinawm ber te zinga mi a ni.
Vance hi Trump hnuaia populism thar standard-bearer anga ngaih niin Vance hian Trump a isolationist, anti-immigration America First movement a thlawp a ni.
Vice President atana modern history a thlan zinga tawnhriat nei tlem ber niin Senator term khat chauh la ni Vance hi Trump-an issue hrang hrang abortion ang chiah te a a ngaihdan thlawpa kalpui zel thei tura ngaih a ni.
Vance hian kum 2016 khan lehkhabu ‘Hillbilly Elegy’ Appalachian family an nihna leh Rust belt a tlawm taka a seilen chhoh dan a ziahna lehkhabu chu a tlangzarh a, hei hi a larpui em em a, America a thingtlang hnathawk te lungawilohna auchhuahpuina anga ngaih a ni.
A hma chuan Vance hian Trump a duh lo hle a. Na tak taka Trump lo sawisel tawhin ‘idiot’ tih te, ‘mi ti na thei’ tih te, ‘demawm’ tih te leh ‘America’s Hitler’ tih te in Trump chu a lo sawisel tawh thin.
Mahse, a hnuah Vance chu Trump thlawptu langsar ber pawl niin Trump pawhin kum 2022 Ohio senate race ah Vance hi a thlawp zui bawk.
Trump chuan Milwaukee a Republican convention neihnaah Vance chu a running mate ah a puang a, ni li chhung inhmuhkhawmna Lake Michigan kama neihah hian Republicans 50,000 chuang an pungkhawm a ni.
-- Advertisement --
Eng vangin nge Trump an JD Vance a thlan?
Kum 2016 khan Donald Trump chuan a runing mate-ah Indiana Governor Mike Pence a thlang a, Pence a thlanna chhan kha evangelical Christian te Trump ringngam chiah lo te hui nana tihna anga ngaih a ni.
Kuminah erawh JD Vance a thlang a. A hma ang bawkin Ohio senator hi Trump campaign startegy kalpuia mi pawimawh niin White House a luah a nih pawhin a policy kalpui zel theihna tur atana pawimawha ngaih a ni.
Vance a thlanna chhan ber pakhata ngaih chu industrial Midwest battleground states inthlana chak leh chak loh hril thei hisap tia sawi a ni a.
Vance hi Ohio chhuak niin a lehkhabu Hillbilly Elegy avanga lar em em niin he lehkhabuah hian a blue-collar upbringing in politics leh khawvel a thlir dan a thlak dan a ziahlanna a ni.
Vance hmang hian Trump chuan white working-class voters te a hip zual theih beisei a ni a.
Trump chuan Vance a thlan thu a puan hnua social media post a siamah pawh a running mate chuan ‘Pennsylvania, Michigan, Wisconsin, Ohio, Minnesota leh a piah lam thlenga American workers leh farmers te tana theihtawpa a lo beih thin chu a thlurbing zel dawn a ni’ a ti.
Vance hi kum 39 chauh niin la thalai zawk a nihna chuan thalaite a hip phah thei tura ngaih a ni bawk a. Chu mai bakah Maga Republicans new generation hmatawng a ni dawn bawk a. Trump-an president nihna a chelh a nih chuan vance chu kum 2028 presidential nomination a hnaih nghal thuak ang tih a ni bawk.
Vance leh Trump te hi an political ideology a inang hle bawk a. Trade, immigration leh foreign policy ah an ngaihdan a inang a. Vance pawh hi Ukraie indonaa US support sawiseltu a ni bawk.
Tu nge Usha Chilukuri Vance?
JD Vance nupui Usha Chilukuri hi Indian immigrants fanu niin academic background tha tak nei a ni bawk.
Yale University atangin Bachelor degree a la a, University of Cambridge atangin Master of Philosophy a zo bawk niin New York Times chuan a tarlang.
Legal field lamah pawh career hlawhtling tak neiin Supreme Court Justices John Roberts leh Brett Kavanaugh te clerk a thawk tawh a ni bawk.
San Diego, California a seilian niin zirna leh thawhrim ngai pawimawh a thupuia nei a ni. Academic lamah hian Managing Editor of the Yale Journal of Law & Technology leh Executive Development Editor of The Yale Law Journal pawh a lo ni tawh bawk.
Yale a extracurricular activity rim zeta kum li lai a tih hnuah Cambridge-ah Gates fellow in a zir leh a, heta a awm lai hian left-wing leh liberal group te nen an inhnimhnai hle a. Kum 2014 khan Democrat-ah a inziak lut nghe nghe a ni.
Usha Vance hi a pasal hlawhtlinnaah mellung pawimawh tia sawi a ni a. Rural White America a social decline chungchangah a pasal a pui nasa tia sawi niin chu Hillbilly Elegy ah Vance chuan ziah langin he lehkhabu behchhan hian Ron Howard chuan kum 2020 khan movie a siam nghe nghe a ni.
US-based global real estate investment advisor leh entrepreneur hriat hlawh tak AI Mason chuan, “Usha Vance hi attorney hlawhtling tak leh Indian immigrants a ni a, a pasal chuan a thalai nihna leh diversity te Trump lamah a hnuk bawk ang,” tiin a sawi. “Indian culture leh India chanchin a hre hneh hle a. USA leh India inlaichinna tha a awm theih nan a pasal a pui thei khawp ang,” tiin a sawi.
Fox&Friends a interview an neihah Usha leh a Senator pasal Vance te chuan rinna hran an neih thu sawiin pakhat Hindu a ni a, pakhat Kristian a ni thung a.
A pasal chungchang a sawiah Usha Vance chuan, “A thawhrimzia leh creative-zia mipui ten an hriain ka hre lo. Engkim a tihah reng reng a ngaihtuah fe hnuah foundation tha zet neiin tih a duh zel a. |ha zawka tih duh zel mi a ni” tiin a sawi.
A pasal a thlawpna chungchangah pawh Usha chuan, “Kei hi sakhaw mi tak chhungkuaa seilian ka ni a. Ka nu leh pate Hindu an ni a, chu tak chu nu leh pa tha tak an nihna chhan niin ka hria a, midangte laka an thatna chhan pawh niin ka hria. Chutih laiin JD hi chuan thil zawn a nei a, a zawn tak pawh niin ka hria” tiin a sawi.
Vance hi James David Bowman tih hming puin Ohio-ah a nu addiction avanga buaiin a hring a, nausen a nih laiin a pain a kalsan zui a, a pi leh pu tena an enkawl seilen a ni.