Thlalak phochhuah pahin intihsiak

World Photography Day vawi 186-na denchhenin Mizoram School of Photography leh Photography Club of Mizoram tangdun buatsaih Photo Art Exhibition & Competition vawi 9-na chu Thawhlehni khan MLA Baryl Vanneihsangi’n a hawng. August 23 thleng a awh ang.
MLA chuan thlalak hmangin hun pawimawh leh ni chhinchhiah tlak lak niin, Mizo culture leh history vawnthat saktu an ni a, kan hriatrengna a hunlai ang maia min ngaihtuah let tir theitu an nih avangin thlalathiamte an hlu hle tih a sawi. Hun inher zelah photojournalist tha tak neih a hun tawh hle, tiin, a thiam leh tuimite pawh photojournalist puitling ni tura inchherhriam turin a sawm a ni.
Photo Exhibition & Competition hi a duh apiang tana tel theih niin, thupui thlan bik a awm loa, thlalak 108 a lut a, mi 49 telin, result puan nghal a ni. Kum 2017 atang khan kumtin anmahni sum sengin Club member-te sum thawhkhawm leh entry fee atanga buatsaih thin a ni a. Mizoten photography pawimawh zia inzirtirna atan, kan ram thing leh mau, nungcha humhalh an tul zia, faina leh thianghlimna kawnga inzirtirna tha tak a nih zia leh mipui zirtir theihnan photo exhibition buatsaih thin a ni.
MSP Gold Award chu Mama Ralte, RepublicVengthlangin a dawng a. Rs. 10000, trophy leh certificate hlan a ni. MSP Silver Award chu Lalbiakzama, Dam Vengin dawngin, Rs. 7000, trophy leh certificate; MSP Bronze Award chu Lalawmpuia, Model Veng, Rs. 5000, trophy, certificate hlan a ni.